約滿英皇 自組工作室 林峯做娛樂大亨包起吳千語
歌視皆能的林峯為再創事業高峰，密謀成立工作室話晒事兼招攬藝人，打造自己成為娛樂大亨。除與音樂人鄧智偉合作外，更有意將女友吳千語收歸旗下有錢齊齊搵！日前為籌備新公司而忙到「瘋」的林峯，留港也無暇約女友，單拖趕買飯盒頂肚餓。
入行18年的林峯事業一向順風順水，被無綫捧足15年的他，歌、視、廣告、商演及演唱會瓣瓣掂，除是御用一線小生外，更曾在無綫的《勁歌金曲頒獎典禮》中分別膺兩屆「最受歡迎男歌星」、三屆「亞太區最受歡迎歌星」，更摘下「金曲金獎」獎項。爆紅的他3年前以1億天價加盟英皇，主力開拓影帝路。
繼續與舊公司合作
據知，近年在內地發展理想的他，3年前憑年賺逾2,800萬港元，登上福布斯中國名人榜第53位，其雄心已志不在影帝，加上其他藝人自立門戶成大趨勢，如香港的劉愷威、王祖藍及葉璇，台灣則有吳奇隆等。自組公司似乎已為成功藝人的指標，況且當家作主，除可擁有百分百話事權，可自己捧自己外，更避免分佣，全程賺到盡，故37歲的他打算跟英皇滿約後，立即開公司做老闆。據知，他傾掂多年來合作無間的音樂人鄧智偉做拍檔，更有意以雄厚財力簽有「錢途」的藝人，有傳其女友吳千語就是頭號目標，擺明要跟至愛女友「峯語同路，有福同享」。
不過林峯與英皇都是有情有義，縱使即將約滿，仍會保持良好關係。早前林峯在廣州舉行巡迴演唱會時，英皇為他打造全廣州最大的四面台，還加碼7位數字，為他訂製太空機械吊臂，讓他在離地30呎的高空中過空中飛人癮。他亦深明英皇無論在中、港或海外的人脈、資源俱佳，在「做生不如做熟」的大前提下，英皇不失為最佳合作夥伴，故林峯不排除日後和舊公司有長遠的合作計劃。
昨日聯絡林峯經理人霍汶希，她坦承林峯約滿在即，不再續約：「佢諗住自己做，佢想成立自己嘅工作室，但英皇依然同佢有好多合作，好似有幾部電影、電視劇，我哋之前幫佢主辦嘅世界巡迴演唱會都會繼續做，大家只不過轉咗一個合作形式。」
冇時間坐定定食飯
另外，近期忙於自組公司的林峯，除了忙到冇得搵千語BB拍拖外，就連去餐廳坐低食飯都冇時間。日前下午，戴Cap帽、穿短衫短褲的林峯於灣仔的健身室做完Gym後，獨自步出街頭上車，吩咐司機載他到附近餐廳。林峯快速買了雞飯外賣，然後在車上食完繼續開工。反觀千語BB日前工作後，即換上波鞋與朋友行街歎茶兼扮靚，唔阻男友發展鴻圖大計。
文：音樂組
攝：追蹤組
|
鍾意就快D Share啦！
|
|
|
