四母子獲准回流返港，早前 Isabella湊住孖仔去公園放電。
娛頭
換保鏢班底 熱戀梁洛施甩李澤楷監控
同李澤楷分手六年，上月梁洛施（ Isabella）被本刊踢爆密會一名年約四十歲的四眼男，兩人公然在餐廳暗角調情。終於有仔敢埋身，重新出發的 Isabella，諗計甩李澤楷監控。
湊住李嘉誠三粒男孫的她，一直得到李家無限量照顧。今年初獲准帶三子返港定居，李澤楷更為四母子安排保鏢、坐駕，兼入住數碼港豪宅。但有新歡後， Isabella不想身邊有李家探子，拒絕小小超「好意」，十月換掉李家保鏢班底，更同三子秘密搬離數碼港，另覓豪竇過新生活。
帶三子返港定居
在芸芸「楷女郎」當中，只有 Isabella成功為李家留下血脈。○九年，年僅廿二歲的 Isabella，為李澤楷誕下大仔李長治，翌年再添一對孖仔 H&N，可惜二人關係維持四年便玩完。同豪門擦身而過， Isabella一度同三子定居多倫多。
眨吓眼大仔長治已經八歲，同李澤楷餅印一樣；兩個弟弟則一個似李澤楷，一個如「迷你李嘉誠」，三粒孫都深得爺爺歡心。阿爺掛孫心切，以往一年最少下旨兩次，要 Isabella帶三粒孫返港敍天倫。直至今年初，李澤楷終於決定接 Isabella母子返港。
「今年年頭 Bella已經湊咗孖仔返嚟，長治就留喺多倫多讀多一個學期，六月先同婆婆一齊返。三個小朋友都好適應香港生活，同埋已經返緊學，短期內都唔會返過去喇！」 Isabella身邊人透露。
不想被掌握行蹤
返港後李澤楷安排四母子入住位於數碼港豪宅，出入都有司機接送，又有李氏保鏢團隊跟身。但已有新歡的 Isabella，不想長期被對方掌握行蹤，早前已搬屋兼換新保鏢班底，本刊發現上月四母子身伴已有新保鏢團隊登場。
「依家有拖拍， Bella唔想 Richard放咁多人喺佢身邊，平時如果唔係湊住啲仔， Bella盡量都唔坐李家啲車，寧願坐的士。」知情人續說。
湊仔拍拖兩個樣
平日將大部分時間放在三個仔身上的 Isabella，早前跟新保鏢團隊，帶一對孖仔到淺水灣公園放電。當日所見，已經七歲的孖仔 H&N，無論樣貌、身高同打扮都倒模一樣，非常可愛。二人在公園擒高擒低，精力無限。但著住短裙的 Isabella，因為公園多蚊，不停左抓右抓，極不耐煩兼面燶燶，同本刊早前拍到她密會新歡時的含春樣，天淵之別！不過她仍相當警覺，不時四圍張望，又為孖仔影相。至晚上，三母子會合梁母及大仔去開餐，有母親幫忙，她才顯得輕鬆點。
由於三個仔比較好動，齊齊出外放電較為大陣仗，有時 Isabella媽媽帶三個孫去公園玩，便要出動三個保鏢貼身睇實，實行人盯人。其間大仔長治比較喜歡獨自玩，跟孖仔 H&N較少交流。
事實上， Isabella四母子感情極深，尤其跟大仔，今年六月長治返港， Isabella親自去接機。當時兩母子已分開半年，長治見到媽咪興奮到跳吓跳吓，即刻攬實媽咪，場面溫馨。
幫襯老麥好貼地
一向跟足李家規矩教仔的 Isabella，貫徹李家平實作風，平日出入地方都非常平民化。早排 Isabella湊住孖仔幫襯老麥，同行仲有其他小朋友。當日孖仔非常活躍，把口無停，又不時手舞足蹈，一時扮打拳，一時又跑來跑去， Isabella冇咁好氣，坐埋一邊密密食。
有新歡約法三章
同小小超劃清界線， Isabella專心湊仔， dry足六年，最近終於有仔埋身。上月尾，本刊直擊 Isabella同新歡在圓方拍拖睇戲，兼消夜直落。其間男方更捉住 Isabella玉手狂啜三十三啖，又隔住口罩 goodbye kiss，好癡纏。拍拖還拍拖， Isabella湊住三個李家金叵羅，同「小小超」一早有共識，一切要以三子行先。
「 Richard唔會干涉佢嘅私生活，總之 Bella湊得三個仔妥妥當當， Richard都唔會詐型。就算 Bella依家有拖拍，佢一定搞掂晒啲仔，照顧好佢哋，夜晚先抽時間出去拍拖。」 Isabella身邊人說。
李嘉誠全天候保護七個孫
李嘉誠一向對七名孫仔孫女甚為保護，除早前長子李澤鉅的二十一歲大女李燕寧，獲御准跟爺爺現身馬場，其他李家第三代的樣貌從沒公開曝光。
每年元旦，李嘉誠均會帶同家人拜祭亡妻莊月明，過去李燕寧，以及另外兩個分別十七歲及十三歲的妹妹李思穎與李燕容，每次都以黑超及口罩遮樣。至於十一歲弟弟、李家長男孫李長禧（ Michael）更獲特許，可缺席拜祭，以免容貌曝光。
由於身份特殊，就讀漢基國際學校的 Michael在校內非常低調，校方亦批准他帶保鏢上學。有指當年李嘉誠為讓 Michael隨其父親及叔叔腳步，入讀聖保羅男女校，曾有意向學校捐出九千萬，惟校方堅拒讓 Michael帶保鏢上學，李家惟有另覓學校。
至於次子李澤楷的大仔長治及孖仔 H&N，由在加拿大到回歸香港，同樣長期被保鏢團全天候保護，保安嚴密。
終於話事
做富豪身邊的女人，要識分寸、懂低調行事，但隨着得寵度升高，慢慢會有自由度，終於可以自己話事。
撰文：娛樂組
攝影：攝影組
|
鍾意就快D Share啦！
|
|
|
