陳曉東出力捽平反硬膠
歌手陳曉東闊別香港樂壇近10年，回歸香港有好多搞作，除推出廣東歌《時間做證》外，更有意在港開個唱。但不少人更關注他的樣貌「塑化」！他自嘲一直被指為塑膠造，為破解不是硬膠，他不惜在鏡頭前用手指大力捽面以證有彈性。
現年42歲的陳曉東（東東）一直保養得宜，暫別香港樂壇多年樣貌依舊，早前返港出席萬希泉活動及接受本報專訪，對於多年來被指整容，他完全不介意，更突然出手捽面，在左邊面用手指大力捽左捽右，捽足4秒，面珠更瞬間留下手指印。他說：「啲人話我塑膠造，是但啦，因為呢個世界Keep得好，就話你玻尿酸，Keep得唔好，就話你老成咁，你想我點？拉爛塊面咩！郁得o架！唔係唔郁得！作為藝人，每一個階段自然有每一個階段嘅樣，我只會愈來愈老，有一日好快皺紋會出晒嚟，係另一樣嘢，好彩我本身屬Baby Fat，我好鍾意清潔，有潔癖，我鍾意抹面乾淨，會用護膚品，都貪靚。」不過，他自爆工作時才貪靚，平日竟然被陳媽媽彈他不修邊幅：「媽咪同親戚嚟到北京都話我，你係藝人，唔該你執吓你個樣，搞到生意失敗咁。」
操肌暖身騷手臂
希望在港開個唱的他，表示細節仍在洽談：「對上一次發廣東歌係9年前，我想開演唱會，可能明年秋天後，所以想中間開一個先。」現時身在北京的他，昨日在社交網上載做Gym大騷結實手臂的照片，他稱操肌不是全為準備演唱會，因為在上海拍完劇後「散散哋」，加上北京溫度跌至零下，故做Gym暖身。對於操肌成果，他笑說：「冇度尺寸，自己骨架唔大，淨係要求合乎人體比例就夠，唔係想練到史泰龍咁，唔想到時手臂粗過個頭。」
東東出道時在港曾紅極一時，但頭頭碰着黑，2003年轉戰內地拍劇，其後憑內地劇《蘭陵王》再度爆紅，之後定居北京。提到當初在內地工作的辛酸，他以幸運來形容自己：「我算得啲乜，我係一個好幸運嘅藝人，一路感恩喺中港台三地有合作機會。唔係要鬥幸運，工作滿足感係最重要，保持陽光心態，遇強愈強。」他形容自己是歌手、音樂製作人、創作人，會傾合約，做專輯發行及設計等多重身份，自組公司十足經理人一樣。
中港台狂掃物業
在內地打拚多年狂賺人仔，但他強調不是全為錢，是以發展為前提：「錢已經唔係最重要因素，好似出唱片，自己發行，都可能蝕本，但你嘅作品係一生一世嘅。」他坦言一直都有投資房地產，笑言是位搬運工人：「賺到錢就搬去地產商，又搬畀賣衫品牌，又搬畀公司，其實係搬運工人。我偏愛買磚頭。（投資大賺？）大家都知過往十年合埋眼，喺大陸買邊度都會賺，資產係一個安全感，到一個時間會捨得買同賣，都係一個搬運。」東東物業遍布中港台，單是在北京朝陽區便有多個物業揸手，問有否十個物業？他說：「唔透露得要保密，都係照顧屋企人買吓磚頭。」
文：名人組
攝：劉斌
|
鍾意就快D Share啦！
|
|
|
