現年42歲的歌手陳曉東（東東）一向保養得宜，暫別香港樂壇多年樣貌依舊，早前返港出席萬希泉活動及接受東網專訪。對於多年來被指整容，他完全不介意，更突然出手捽面，在左邊臉用手指用力捽左捽右，捽足4秒，面珠更瞬間留下手指印，他說：「啲人話我塑膠造，是但啦，因為呢個世界keep得好，就話你玻尿酸，keep得唔好，就話你老成咁，你想我點，拉爛塊面咩！郁得㗎！唔係唔郁得！作為藝人，每一個階段自然有每一個階段嘅樣，我只會愈嚟愈老，有一日好快皺紋會出晒嚟，係另一樣嘢，好彩我本身屬baby fat，我好鍾意清潔，有潔癖，我鍾意抹面乾淨，會用護膚品，都貪靚。」不過他自爆工作時才貪靚，平日竟然被陳媽媽彈他不修邊幅，說：「媽咪同親戚嚟到北京都話我，你係藝人，唔該你執吓你個樣，搞到生意失敗咁！」
自己做埋經理人
希望在港開個唱的東東，表示細節仍在洽談：「對上一次發廣東歌係9年前，我想開演唱會，可能明年秋天後，所以想中間開一個先。」現身在北京的他，在社交網舖出他於北京做GYM大騷結實手臂照，他說操肌不是全為準備演唱會，因為在上海拍完劇後，揚言「散散地」，加上身在北京溫度跌至零下，故以做GYM抗寒。對於操肌成果，他笑說：「冇度呎吋，自己骨架唔大，淨係要求合乎人體比例就夠，唔係想練到史泰龍咁，唔想到時手臂粗過個頭。」東東出道時在港曾紅極一時，但頭頭碰着黑，2003年轉展到內地拍劇，2008年憑內地劇《蘭陵王》再度在內地爆紅，之後定居北京。提到當初在大陸工作的辛酸史，他以幸運來形容自己：「我算得啲乜，我係一個好幸運嘅藝人，一路感恩喺中港台三地有合作機會。唔係要鬥幸運，係工作滿足感係最重要，保持陽光心態，遇強愈強。」他形容自己是歌手、音樂製作人、創作人，會傾合約，做專輯發行及設計等多重身份，現時開了一間公司，實行自做經理人。
鍾意買磚頭
在內地打拼多年，狂賺人仔，但他強調不是全為錢，是以發展為前題，他說：「錢已經唔係最重要因素，好似出唱片，自己發行，都可能蝕本，但你嘅作品係一生一世嘅。」他坦言一直都有投資房地產，笑言是位搬運工人：「賺到錢就搬去地產商，又搬畀買衫品牌，又搬畀公司，其實係搬運工人，我偏愛買磚頭。（投資大賺？）大家都知過往十年合埋眼，喺大陸買邊度都會賺，資產係一個安全感，到一個時間會捨得買同賣，都係一個搬運。」東東物業遍佈中港台，單是在北京朝陽區便有多個物業揸手，問有否十個物業？他說：「唔透露得要保密，都係照顧屋企人買吓磗頭。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
