亞視奇迹復活 陳志雲掉轉槍頭做百萬富翁
亞視宣告「復活」！以數碼媒體重生！不但羅致前無綫高層吳雨擔任行政總裁，更請來何麗全、區偉林、朱慧敏和曾華倩等無綫幕前、幕後舊將掉轉槍頭！當中最矚目莫過於陳志雲倒戈，擔任曾創39點收視的亞視最強節目《百萬富翁》主持，向無綫擲出震撼彈，誓再創神話！
亞洲電視自去年四月一日「熄機」後，一直受債務問題困擾，雖然其前主要投資者兼債權人王征已向他人出售債項，但無綫好快便接替其角色，成為亞視清盤呈請人並打算追回二千四百多萬巨款，令亞視似乎「翻生」無望。
不過，昨日一班亞視擁躉就收到好消息，因法庭宣布批准亞視最新債務重組方案，同時撤回清盤呈請。而亞視方面亦發稿公布喜訊，指最新的協議計劃繼在債權人會議上通過後，亦獲得法庭批准，所以未來會重組董事會，讓亞視在新董事會的管理層領導之下恢復正常運作，意味亞視「復活」有期！
吳雨：18號推出App試播
不少以往為無綫效力的舊將都已經加盟亞視，包括前高層吳雨、何麗全、區偉林等，其中獲委任為行政總裁的吳雨，受訪時指亞視將以數碼媒體重生，並將於本月18日舉行「亞洲電視數碼媒體有限公司重組啟航暨應用程式啟用儀式」：「之前協盛協豐控股用咗六億向王征買番啲股份同廠房設備，到（本月）18號公司就會正式成立，首先會推出App，會搞一個典禮同試播。而一月底我哋個OTT都會開播，大家到時可以用機頂盒睇。」他又指除自家製娛樂節目外，亦會購入中外電影、電視劇等播放，更設購物台照顧觀眾各方面需要。
由陳啟泰主持的《百萬富翁》堪稱亞視最強節目，曾為該台創下歷史性39點收視高峰，吳雨透露亞視「翻生」後會火速製作全新一輯《百萬富翁》，並邀請無綫前高層陳志雲倒戈，取代陳啟泰擔任節目主持，而節目亦會一如以往，最高向每位參賽者派發一百萬現金！陳志雲接受訪問時未有否認，又指自己好開心亞視以另一種形式重生，讓觀眾多個選擇：「其實我都係最近由幕後轉到幕前，工作性質、接觸嘅嘢同以前真係好唔同，感覺好有趣、好新鮮。」
陳啟泰唔Mind「被飛」
至於「被飛」的陳啟泰就表示非常期待陳志雲主持《百》：「我覺得佢好適合做呢個節目嘅主持，以我當年主持咗幾百集嘅經驗，主持呢個節目最重要係冷靜同淡定，至於氣氛，由現場觀眾帶起就好夠。」最近與ViuTV合作的他戥亞視「翻生」高興：「雖然暫時未有人搵我，但係多番個平台，可以等以前亞視嘅幕後有番工作機會，我相信將來都有機會同亞視合作。」而吳雨亦表示曾為無綫工作的朱慧敏、曾華倩和梁思浩等都會「掉轉槍頭」加盟，並已聘請前樂視的幕後員工負責OTT事務。
文：影視組
|
鍾意就快D Share啦！
|
|
|
