現年67歲的黃玉郎與倪詩蓓1998年相戀，2000年誕下兒子黃英樑（Royce），但可惜患嚴重自閉症Royce，兩人一直未有註冊，並於2004年因性格不合而分手，倪詩蓓其後帶着兒子到新加坡定居，兩年前Royce返港，由黃玉郎照顧現年17歲的仔仔，平日入讀寄宿學校，周五放假便接回家相聚，周六再回學上課，黃玉郎接受東網專訪時說：「同佢相處好開心，初初佢返嚟好肥，好呆滯，頭耷耷，唔願望人，相當自閉，乜都好似好驚，經過兩年學校同我哋照顧後好咗好多，肯望鏡頭笑吓，心情開心好多，以前佢沖涼完全唔識，依家識七八成，好多嘢進步。」他續說：「我一直好錫個仔，鍾意帶佢去玩，去郊遊，教佢好多嘢，教佢識踩單車，以前佢連上單車都唔肯，好開心，佢不斷有進步。我啲好朋友好似樂易玲、楊諾思好關心我個仔，叫我帶佢去教堂，嗰度有啲專門畀呢啲小朋友，我就經常帶佢去教堂，感受一吓多人一齊嘅感覺，多謝班朋友咁關心，佢去到教堂好適應，見咁多人都好ok，啲工作人員義工同佢傾偈佢又好ok，通常呢啲小朋友唔鍾意去人多地方，成個教堂二百幾人，唱歌又咁大聲，佢又ok。」
拎過香港特殊奧運會金牌
Royce患嚴重自閉症，他表示兒子智商只有兩歲，不懂得與人溝通，初時只懂講簡單單字或雙字，只會跟着別人說話，但自從兩年相處下來，看到兒子很大進步：「佢初頭完全係copy cat，我講你好嘛？好唔好食？佢完全跟番住你講，廣東話完全唔識，單字講都唔正，依家就好咗好多，唔再係copy cat，真係好開心，唔係copy cat即係佢明白我講乜嘢。」他說兒子並沒有甚麼特長，他笑言最搞笑是平衡力很好，可以踩着浮板浮在泳池水上不會掉下來，並自學了游泳，故覺得兒子運動不俗，並透露Royce曾在香港特殊奧運會比賽中，在拋圈運動摘下金牌。
為了照顧兒子的健康，他對兒子飲食尤其關心，提到兒子兩年前回家時，十分肥胖，現在已改善到標準身形，他說：「平時畀營養嘢佢食，豬扒、蔬菜和魚，營養足夠，而唔會肥胖，呢樣係成功嘅，學校餐單好有營養而唔會太鹹太甜，呢段時間好成功，去到標準體形，如果肥胖會擔心佢健康上出問題，肥會係大問題，呢類小朋友唔會太喜歡運動，鍾意坐，缺少運動係一個大問題。」問到兒子會否容易抓傷自己？他說：「佢感冒會捽鼻，係會整到鼻紅晒，發忟時會抓傷自己，但係好小嘢，佢係想表達又表達唔到，唔識用語言表達就會發忟，發忟時想捉住人，會唔覺意抓傷人，自己都唔少嘅，自己着長袖遮住，不過教吓教吓佢，發忟情況少咗好多，因為都了解佢想要乜嘢，情緒唔會經常激動。」
Royce見大姑媽最興奮
黃玉郎說與兒子相處無問題，讚兒子性格溫馴，兩年來未見過兒子打架或傷害人，當兒子出現情緒時，他已學會引開兒子注意，他說：「儘量都要安撫佢情緒，如果佢有情緒時，氹吓佢，佢好得意，同佢講吓第二樣嘢佢又冇嘢。」兒子明年一月便屆十八歲，其寄宿學校只可容納學員至十八歲便要離開，故他已為兒子打算將來，希望能安排入展能中心，他說：「呢類成年朋友，早上九點半去中心學嘢做嘢，下晝放學，就可以同我哋一齊。」問他對兒子的期望？他感觸地說：「我期望佢能夠不斷有少少進步，發覺佢有少少進步就好開心。（能獨立自理？）完全自理梗係最好，要佢完全自理，相信要一段長時間。（照顧兒子勞心勞力？）勞心一定，勞力有其他人幫手，屋企有兩個傭人，有司機，最重要係親人，大家姐、妹、我未婚妻，都好願意幫手，所以坦白講唔係咁困難。（Royce鍾意你哋屋企人？）佢個幾兩個月冇見大姑媽，上個月帶家姐見佢，Royce好緊張，捉住家姐隻手唔放，心諗，豈有此理，對我家姐好過對我？見我家姐之後佢就唔係好騷我，見我家姐開心到上氣唔接下氣，佢只係見到家姐先咁，人夾人緣。（Royce鍾意你未婚妻？）未婚妻都錫佢，好照顧佢，Royce都鍾意佢。」
最想帶仔去玩
但十月起，突然被禁不能帶兒子回家，連帶中藥給兒子飲也不能，令他非常不高興，他說：「Royce手好冰冷，之前睇過中醫，嗰日我帶埋我媽媽去，好奇怪，我仔身體仲差過阿媽，中醫話叫虛寒，情況比媽媽更差，我媽媽九十歲，呢啲係血氣唔好，中醫開咗中藥要飲用三個月調理，虛寒唔係一朝一夕，係累積好長時間，唔知乜原因，自閉症患者一定運動少，可能吸收凍嘢多，自然虛寒。（除咗虛寒身體冇大礙？）冇大礙。」原本每天送中藥到學校給兒子服用，但飲咗兩個月後，突然被禁止帶藥到學校飲用。他說：「發生呢件事情，係幾唔高興。」他又指計劃入稟向前女友爭取兒子撫養權！
Royce明年一月便十八歲，黃玉郎現在最大希望可以陪兒子慶祝生日，帶兒子去玩，他說：「依家唔可以喺學校帶佢出嚟，已經個幾月嘅事。（想同佢過生日？）係。（送乜禮物畀佢？）錫多佢幾啖，唔敢送啲發聲玩具畀佢，佢會沉迷，佢鍾意搖搖拍。（想見佢多啲？）最想恢復番之前生活節奏，個個禮拜接佢出嚟。」他說自己也是大細路，與兒子玩玩拋波和互「唧」，正是父子之聞最大樂趣。
提到兒子一些往事，黃玉郎一時感觸，忍不住鳴咽，再問到他是否一位好爸爸？他說：「我唔係，應該當初唔畀阿仔去新加坡（係令你好後悔嘅事？）係其中之一做過後悔嘅事。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
