賭王三房千金何超蓮近月投身「副業」Smile with us HK，而她現在「正職」就是與家姐超雲及弟弟猷啟合力打理母親陳婉珍的物業及投資生意，當中超蓮出任澳門勵駿非執董一職，更負責三房家族生意不少投資項目，最近她花了3年心機、翻新了位於澳洲柏斯的洲際酒店，上月底終於完成開幕。
超蓮12年在倫敦大學修讀經濟一級榮譽畢業，人生第一份工就是幫屋企做暑期工，業務是「打雜」。問到她人工多少，她笑言：「差唔多係義工，阿媽話我畀司機你返工，食飯又返嚟屋企食，你有咩開支呢？係有人工，高過最低工資少少。工作性質簡單嚟講係做打雜，公司任何人需要幫手都要做，做公司最細最細嘅角色，任何人需要係影印，開會要take notes、聽電話都要做，因為阿媽已落了order，叫佢哋唔可以唔使我。」
畢業後，超蓮就往外闖，在倫敦考入Big Four之一的安永會計師樓打工，由intern做起，之後升職再轉去北京分部，邊打工邊考會計師牌，問到她遺傳賭王數口精而去考會計牌，她開玩笑表示是貪圖考試有假請的原因：「我喺公司做嘢，有好多project要跟，見到有啲人返返下工可以take leave，原來考paper有成個月study leave，有錢又可以放假，覺得呢件事好歎。」她表示考會計師牌是自發性決定：「屋企無畀過任何壓力我，係我想去考，因為我爹地好鍾意呢啲乜師乜師係好叻嘅，於是我好想佢有一女係乜師乜師佢就僧會好開心。呢類專業資格係唔可以用錢去買，真係要去考，無論係邊個都係要去考，我想話畀爹地聽我靠自己去考呢個試都考到嘅，希望佢會覺得開心。」
回到公司打理家族生意，她就憑興趣揀了翻新酒店呢個項目，她表示：「間酒店一路無翻新過，都30年，翻新佢，簽contract，搵過另一間management，啲內籠全部拆晒。我好想係一個Project由零開始跟，呢個project由零開始，所以好有成功感。」問到幫屋企同出去打工的分別，超蓮表示各有利幣：「 屋企打工請假容易啲，只係同媽咪講請假，外國嗰啲你唔會夠膽同嗰阿head請假，跟緊一個project，你係最small嘅potato，話要請假係唔夠膽請；媽咪嘅話，會project同project之間會放個假佢都ok。慘嘅係，你喺出面做嘢，放工就係放工，幫屋企手，放工唔等於放工，返到屋企食緊飯，任何時候阿媽問起公司呢樣點，你都要答得出，你要即刻答到，即係冇得放工。」
守業當然不易，超蓮自言有壓力：「壓力唔係屋企畀，壓力係你知道媽咪放手畀你管呢樣嘢，你唔可以令佢失望，唔可以做錯同出錯，所以個壓力喺自己到，自己唔想阿媽信錯咗我。」問到會否想做過做接班人，超蓮表示沒想過：「大家都係兄弟姊妹，唔需要講呢啲，最緊要分工，大家幫到手就得，屋企一定係要幫同要跟，大家會分工，除咗屋企，我都會有自己嘅嘢，遲啲可能會開餐廳去創業。」
採訪：梁錦雯、譚倩宜
攝影：林德雄
攝錄：吉吉、馮峰
協力：林賓利
|
鍾意就快D Share啦！
|
|
|
