無綫台慶劇《溏心風暴3》差唔多已經去到中段，不過收視依然冇起色，喺周二啱啱公佈跨平台收視，上周平均收視有21.4(約139萬觀眾收看)，比前一周跌咗0.1點，估唔到首周收視低開後，持續性下跌，唔知下一周嘅收視會唔會跌穿2字頭？
陳敏之同唐文龍呢段婚外情，喺呢個禮拜成為焦點，人妻陳敏之同唐文龍喺戲內有唔少床上戲，幾乎集集都會見到敏之著住白色浴袍晒黑色喱士內衣，呢對偷食男女認真猴擒！可唔可以喺挽回收視，要下個禮拜先知道，但係下周嘅劇情，喺網上已經可以睇晒。
因為敏之唔甘心唔可以喺大時大節見到唐文龍，本來諗住走去唐文龍屋企，最後約咗喺男方嘅屋企樓下見面，結果最終係分手收場，點知敏之愛到不自拔，隔咗幾日又走去死纏唐文龍，最後又走番埋一齊！之後李成昌為咗報復被揭發私下買股票，走去搵私家偵探去跟夏雨一家，結果發現敏之同唐文龍嘅姦情！
夏雨知道之後，認定係唐文龍搞自己個女，於是乎一怒之下炒咗對方，胡琳知道老公唐文龍同敏之有路，帶埋個女坐車去機場，唐文龍知道之後，即刻揸車追老婆，點知途中遇上車禍，不過最後可以令老婆留低，唐文龍決定敏之斬纜！知道冇彎轉嘅敏之，去完廟為屋企人祈福之後，去咗自殺，好彩俾黃宗澤同王浩信救返，夏雨仲為咗救女而整損咗，敏之醒番之後，俾屋企人感動而決定好好生活，劇情之後會去返許、黃兩家，許家決定同黃家分家。
|
鍾意就快D Share啦！
|
|
|