熱爆娛樂: 【狗仔出更】孖郭藹明陪父母睇醫生劉青雲勁孝順抱阿媽落車 _

2018年1月31日星期三

【狗仔出更】孖郭藹明陪父母睇醫生劉青雲勁孝順抱阿媽落車 __,劉青雲,郭藹明,青雲,

劉青雲同老婆郭藹明（Amy）係圈中有名嘅恩愛夫妻，不時會行孖咇出街，日前下晝2點出現喺中環置地見到佢哋兩公婆，以為佢哋由西貢出嚟港島行街街shopping放假，但原來唔係「二人世界」去拍拖，而係陪老人家睇醫生，佢哋坐住由司機開嘅七人車去到置地廣場門口，一開車門佢哋好快速落車，然後青雲扶住劉爸爸落車先，劉爸爸撐住枴杖行上行人路等齊人，精神唔錯，之後輪到劉媽媽準備落車嗰時，青雲唔單止用手擋喺媽咪頭頂怕佢撞到，後來索性抱媽咪落地，然後同行嘅外傭同Amy就負責扶住劉媽媽行去中建大廈睇專科。

大約個幾鐘之後，見到青雲一家人睇完醫生落樓，雖然青雲嘅父母都已經80幾歲，但睇落都幾精神，見佢媽咪出嚟時都係自己行路嘅，不過外傭都一路喺旁邊睇住。佢哋等到到司機揸番架車到置地門口，青雲扶完兩老上車，仲幫佢爸爸綁好安全帶，佢先上車離開。

其實當年就係劉爸爸獨具慧眼叫個仔去投考無綫電視藝員訓練班，不過由細到大佢爸爸媽媽都比較錫家姐同細佬，唔知係咪因為青雲細細個已生成黑炭頭咁，唔夠家姐同細佬咁可愛，但係青雲長大成人後對父母非常孝順，只不過佢性格比較內斂，可能唔識口甜舌滑o氹人，但肯定會好細心對老人家。佢曾經喺facebook中講及孝順父母嘅嘢：「不知不覺，我們的父母長輩漸漸年邁，請珍惜與父母一起的時光，多聽聽他們的嘮叨，多給他們打電話，多陪陪他們散步，多幫他們做家務。願天下所有的長輩們健康長壽！」睇嚟青雲唔止講得出，仲做得到，係堅‧孝順！

精選娛聞，喺晒《娛果》

http://fb.com/appledailyent

（攝影：徐錦池）	青雲夫婦日前現身中環	然後劉爸爸落車
睇嚟青雲夫婦都好緊張未落車嘅人	青雲扶住媽咪，另一邊廂Amy都有望吓已經行咗上行人路嘅劉爸爸。	劉媽媽壓軸落車，青雲將兩手挾喺媽咪腋下，劉媽媽好自然咁攬住個仔…
一個轉身，青雲就抱咗阿媽落地	見到Amy呢個笑容，睇嚟好滿意老公嘅表現。
青雲唔知係咪怕醜，見阿媽安全落地就分開行，等老婆同外傭扶阿媽。	劉家兩老睇完醫生，等車離開。	話晒都係港姐冠軍，有美貌有學識，但Amy都好貼地，幫外傭攞嘢。
劉媽媽第一個上車	見到老婆拎咁多袋，青雲似乎想幫手。	尾二上車嘅係劉爸爸
劉爸爸上車後，青雲親手幫佢扣安全帶（紅圈示）。	最後先到青雲上車