崔碧珈今朝約6點就到咗尖沙嘴，準備參加馬拉松半馬賽事，佢係第4年參加渣馬，而跑半馬就係第2次，佢話舊年成績2個鐘頭19分鐘，今年唔厚望，目標唔想超過2個半鐘：「跑步之前一兩日，我夜晚喺公園諗住拉筋郁動下，途中要避狗糞便就扭開，點知就着咗地流血，所以扭親，膝頭又擦損，條褲磨擦會痛，唔急得只能量力而為，但唔會放棄。」而佢都甚為蝦碌，媽咪揸車送佢到場，到達後發現冇帶號碼牌，要另外搵其他家人搭的士送過去：「嚟到見啲跑手心口掛晒號碼牌，但自己好似有啲空虛先發現，頭先媽咪對我訓話。其實我有事前執定嘢，但係冇執號碼牌。」
最後佢以2小時38分完成賽事，事後佢話：「因為早兩日唔小心扭傷咗，所以今日賽事都要視乎自己能力去跑，因為上一次參加半馬成績係2小時19分，今次係2小時38分鐘，其實今次跑時，發覺好多香港係好窩心嘅，因為有啲義工會派啲嘢食俾跑手，沿途同跑手會影相同傾偈，唔知係咪咁而慢咗少少啦。」
崔碧珈仲講到，出咗西隧時，約16、7公里時，因為腳傷嘅問題，自己覺得唔係太舒服，去咗休息一陣，其間有啲女童軍同義工過來慰問，問我有冇事。佢話：「其實我當時真係冇事嘅，只係想休息一吓，有一個成熟嘅女跑手Tammy，約70歲，過來問我有冇事，我同佢傾咗一陣偈，覺得真係好warm，呢個亦係我堅持每一年都要參加嘅馬拉松理由，除咗挑戰自己外，每一年都要提醒自己要有堅持同毅力，同埋跑馬拉松就好似人生咁，千祈唔好放棄，最緊要做好自己，唔需要同人比較囉！」
另徐濠縈同DJ Donald今年跑全馬，差唔多時間衝線，阿徐抱住輕鬆心情去跑：「傾住偈去跑，同幾個朋友，頭先喺西隧口見到自己個廣告，有停低影相，又有同啲參賽fans影吓相，今日嘅時間未必同平時一樣咁快，平時應該快啲，今日冇睇時間去跑。」阿徐賽前準備都係早啲瞓，同埋跑之前一定要食飯先有力氣跑全程：「今日都係有啲辛苦，雖然話成程有輕鬆吹水。」講到「吹水功」邊個勁得過佢老公Eason，阿徐笑言：「喂!佢唔跑得，因為大家唔同公司，即係代言嗰個，囡囡本身都嚟，不過怕混亂，今朝都俾咗個擁抱我，以示支持。」阿徐又話唔會叫囡囡一齊跑，DJ Donald解釋：「阿徐話好輕鬆，但今日大家跟住佢跑，都覺得好辛苦。」
之後阿徐就喺ig留言話：「今天跑得好開心，雖然不是自己最好成績，但可以和隊友有傾有講輕輕鬆鬆一齊跑，沿途不停和粉絲合照，還可以路過自己的billboard時拍照留念，有時過程比成績重要，多謝 」。
精選娛聞，喺晒《娛果》
http://fb.com/appledailyent
| 攝影：仇志德 | | |
| | | |
| | |
|
鍾意就快D Share啦！
|
|
|
