無綫嘅台慶頒獎禮喺今晚舉行，到時候所有獎項都會塵埃落定，本來有傳王浩信今年攞硬視帝，點知因為緋聞影響，再加上《降魔的》嘅走勢又凌厲，o依家機會得番50/50。
為咗捧獎夢唔好落空，王浩信出盡力拉票，好似咁，早前佢喺網上留言話：「你哋嘅鼓勵我真心當自己攞咗！其實拉票對我嚟講一直都係一件好尷尬的事，我覺得如果你哋鍾意咪夠囉…『在心中』OK啦…下次做好啲咪得囉…使乜成日同人講啫！『講.講.講.做喇！』」、「但諗返由入行到今日，呢十幾年嘅每一點每一滴，其實呢個奬一直都係自己嘅夢想，o依家可能係今世人最接近呢個奬嘅時候，我覺得都真係要為吓之前嘅付出再盡多點努力嚟拉吓票，先對得住自己同支持我嘅你哋。」睇得出，王浩信好餓呢個獎。
未到最後一刻都仲要拉票，前晚王浩信睇完《溏心3》結局後又留言：「剛才大結局活動現場，教堂一幕聽到大家為這兩個角色而歡呼，衷心感動！這種大團圓結局也是我這幾年的角色中難得的，對2017年我有份參與的三部作品來說，也畫上了一個很美麗的句號」、「接住落嚟就係厚着面皮mode…大家記住投我一票！」
真告急又好，假告急都好，《踩過界》拍檔張振朗見到呢個局面，都加把口喺ig打氣，佢貼咗一張合照兼留言，都係講番幾個《踩過界》主角好落力拍、付出汗水與淚水呢啲感性嘢，至於重點，就放咗喺最尾「P.S.我好想盲hip攞視帝因為實至名歸」呢句度，撐兄弟撐出面。
不過喺頒獎禮舉行嘅前夕，王浩信依然要趕拍《兄弟》，佢今日喺ig貼咗條片，見到佢隻手擦損咗流血，佢接受傳媒訪問就話：「又唔係話好痛，但係都未有時間搞，因為今晚仲要開工。」心情方面，佢話：「其實都好緊張，因為未有時間準備，不過好期待聽日呢個大日子！」
對手氣勢咁強，馬國明又有冇出招呢？佢回覆傳媒就話：「我都係平常心，個個都有機會，我最希望呢套劇（《降魔的》）攞《最佳劇集》。」唔……果然係天然呆。
|
鍾意就快D Share啦！
|
|
|
