掃呢頁CODE去手機

2018年2月15日 星期四

全城最期待情侶狗年再合體,古天樂宣萱:我哋有十年冇聯絡 [壹週刊 - 1458 - 生活] __,古天樂,宣萱,M1,

宣萱、古仔一埋位,互動、默契十足,點睇都唔似十年無聯絡。探熱針全城最期待情侶狗年再合體,古天樂宣萱:我哋有十年冇聯絡要數圈中最經典熒幕情侶檔,古天樂同 ...






宣萱、古仔一埋位,互動、默契十足,點睇都唔似十年無聯絡。

探熱針

全城最期待情侶狗年再合體,古天樂宣萱:我哋有十年冇聯絡

要數圈中最經典熒幕情侶檔,古天樂同宣萱必定入選三甲,他們由九四年開始,總共合作過八次,當中《尋秦記》更加係經典中的經典,不過自從○一年拍完《尋》劇後,兩人已經有十七年再沒有合作,而且他們原來超過十年無聯絡過。

觀眾餓了十七年,好期待古仔同宣萱有機會再一次合體,終於最近宣萱加盟古仔旗下經理人公司,古仔亦宣布狗年會原班人馬開拍電影版《尋秦記》,呢 pair久違了的熒幕情侶將會再續情緣。

一劇 friend咗

古天樂叫 Mr Cool不是浪得虛名,要和他打開話匣子,難度系數接近一百!宣萱扮 Mall姐入型入格,但私底下為人唔 mean,愛笑更愛說話,兩人性格天和地,九四年兩人首次合作處境劇《餐餐有宋家》,短短三個月便成為好友,點解會咁啱 key呢?

「咁咪啱晒囉,兩個如果都鍾意講嘢,就會成日爭嘢講,又會嗌交。」古仔搶答。

在 TVB拍劇年代,同古仔合作過的對手唔多唔少都會傳吓緋聞,偏偏和他拍過七套劇的宣萱,從來唔過電,多年來只俾傳媒「老屈」過一次。

「我哋真係對大家無興趣囉!唔得㗎,我唔可以對住一個唔講嘢嘅人,雖然佢(古仔)都講嘢嘅,不過要熟咗先會講。」宣萱說。

「我都唔得㗎!我唔可以成日講嘢,我真係會黐㗎!」古仔講到面容扭曲。







十七年無拍過電視劇的古仔,可以同宣萱合體拍劇,相信是觀眾一大喜訊。





兩人再度合作頭炮,就是埋位拍《尋秦記》電影版。





○一年兩人拍罷《尋秦記》,各有各忙,十年沒有聯絡。

八度合作

入行二十五年,宣萱和古天樂合作共八部影視作品,除電影《夜叉》外,其餘合作都是電視劇,由非常匹配的熒幕情侶,到圈外亦是好好朋友,二人曾一度傳出緋聞。

首次碰頭

94年,二人首次合作大台處境劇《餐餐有宋家》而認識,劇中二人飾演表兄妹,角色討好,令初入行的宣萱和古天樂火速入屋。

合作劇接劇

其後二人一劇接一劇,分別於 94年及 96年的《阿 Sir早晨》及《天地男兒》都只是普通朋友關係, 97年,《美味天王》飾演廚王及廚后,角色已經非常入屋。

開始情侶檔

直至 99年,在劇集《寵物情緣》中,二人首度飾演情侶,大獲網民好評,更分別獲「我最喜愛男女主角」。

最襯熒幕情侶

觀眾受落,大台捉緊機會,再以情侶檔開拍《刑事偵緝檔案 IV》及《尋秦記》,劇集令二人事業火速爆升,宣萱和古天樂被公認為最襯熒幕情侶。

斷交十年

在大台的日子,這對熒幕情侶朝見口晚見面,即使大家不是拍同一套劇,也有機會在化妝間、 canteen碰面,全世界都知他們勁好朋友,但隨着古仔○一年拍完《尋秦記》主力拍電影,而宣萱繼續劇接劇,原來他們曾經試過有一段長時間無聯絡。「我哋中間足足有十年無聯絡,可能大家嘅圈子唔同,我多數同讀書嘅朋友,佢(古仔)就多數係工作嘅朋友。」宣萱說。「同埋我唔係好用電話嘅人,無乜人有我直接電話,應該咁講,呢個世界上無人可以直接打到俾我,因為我都唔開電話,邊有人搵到我!而家好啲,有啲乜 apps乜 chat,我點都會覆吓。」古仔說。

「係呀, send短訊俾佢,都只係覆三、兩個字。」宣萱沒好氣說。







宣萱物色經理人幫忙之際,古仔伸出援手拉攏對方成為旗下藝人。





憑住 Mall姐一角,宣萱人氣再度急升。





做訪問時候,宣萱開籠雀好多嘢講又搞笑,連 Mr Cool古天樂都被佢感染,成個訪問都笑到見牙唔見眼,呢個畫面好難得。







兩人多次拍劇都唔過電,多年來只是俾傳媒「屈」過一次撻着。





古仔憑《殺破狼•貪狼》提名今屆《香港電影金像獎》「最佳男主角」,有望大熱封帝。

古仔不再 Mr Cool

快問快答環節,宣萱整體表現,激似她初出道時拍的金×朱古力廣告,傻大姐到一個點,連平日 Mr Cool示人的古仔都忍不住開腔互窒,笑聲不絕,過癮!

壹:第一套合作嘅劇係咩?

古:《餐餐有宋家》

壹:拍劇邊個最忍唔到笑?

宣:我,你唔答嘅!( Mall姐眼神一睥)

壹:對方最注重儀表嘅邊一個地方?

宣:頭髮。

古:頭部以下。

壹:記唔記得對方養過咩嘢品種嘅狗?

古:金毛尋回犬。

宣:錯晒!

古:唔係咩?

宣:我幾時養過金毛尋回犬?

古:你講到我好似你條仔咁,我鬼知你養咩嘢狗咩,大佬!狼狗?唔記得咗喇∼

宣:你記唔記得《寵物情緣》就係你養狼狗,我養金毛尋回犬

古:係呀,戲裡面吖嘛!

宣:現實中你無養過狼狗,我又無養過金毛尋回犬。

古:係咩?……我記得你養嗰啲係唐狗。

壹:如果有機會同對方交換一樣嘢,最想交換乜嘢?

宣:佢間屋。我無咩嘢好過你,你無嘢想交換。頭髮吖,我有幾多。

古:真係無諗過,有咩嘢好交換,真係諗唔到。

壹:講出對方一樣缺點。

古:把口成日唔停。

宣:黑面神。

壹:互讚對方十秒。

宣:高大、靚仔、又夠黑、頭髮又多、好 cool啦、型

壹:做出兩個你哋自拍時最常做嘅表情。

古:對唔住,我唔自拍嘅。唔係啩,你做呢個表情?

宣:你真係好少睇我啲相。梗係唔係記者影嗰啲,係我哋平時自拍嗰種。

壹:一句說話,可以觸怒對方。

古:無喎,句句都觸怒佢。

宣:你講到我好似變態咁樣,我見親你都笑口噬噬,幾時有觸怒我。我都諗唔到。佢今日唔靚仔,得唔得?佢都唔會嬲。

壹:如果古天樂再唱歌,你最想聽佢唱邊首歌?

宣:唔想聽。

古:我亦唔會唱。

壹:開工最鍾意食咩飯盒?

宣:佢唔食嘢。

古:佢就咩嘢都食,把口又係唔停。

壹:有冇見過拍戲以外嘅對方喊過?

宣:無。

古:無。

壹:如果生小朋友,想男定女?

宣:梗係女。

古:男。

壹:用三個形容詞嚟形容自己?

宣:麻煩、奄尖。

古:無回應,正呀。

壹:呢一刻最想食乜嘢?

古:薯片囉,係佢呀。

壹:如果有隨意門,而家最想去邊度?

古:返屋企囉。

宣:歐洲。







餐餐有宋家





寵物情緣





古仔家住貝沙灣獨立屋喎,有無敵海景,想同佢交換間屋住吓,唔難理解。

偶遇促成合作

近年開行 turbo再度活躍拍港劇的宣萱,其實好一段時間無經理人,要靠自己接 job,但隨着工作愈來愈多,開始覺得吃力。

「之前有啲嘢發生咗,令我需要咁樣做(無簽經理人),好多事自己唔係做唔到,不過當慢慢 pick up番啲工作,多嘢做嘅時候,要自己睇合約、覆 email,變咗撥唔到時間出嚟,會好攰好辛苦。」

朋友在需要幫忙的時候,就會自動蒲頭。十年來沒有機會遇上古仔的宣萱,就在這個時候同朋友飯局時巧遇對方,古仔問起近況,宣萱一五一十講起自己正在物色經理人,由於古仔的經理人 Ronnie曾經在 TVB年代同宣萱合作過,所以雙方一拍即合,促成今次的合作。







古仔表示只要遇啱劇本,加上時間許可,會肯回歸拍電視劇。





九九年兩人憑《刑事偵緝檔案 IV》成為「 TVB萬千星輝賀台慶」「我最喜愛的男女主角」。





成為古仔公司旗下藝人的宣萱,近日頻頻孖住對方出席活動。

拍電影版《尋秦記》

宣萱轉投古仔公司旗下,是銳意開拓電影市場?未來有什麼工作等,雙方好有默契賣個關子。順勢再追問宣萱會不會參與古仔今年開拍的《尋秦記》電影版,古仔即刻有好消息宣布:「係!宣萱會有份拍,(係電視版延續,定翻拍之前故事?)呢個我唔知喎,我係一個演員,你要問番導演方面,佢哋先可以話到俾你知!」







不消半小時宣萱掃下一大束鮮花同水仙,滿載而歸。





今年唔外遊滑雪的宣萱,新年前勁忙日日要開工,她表示會趁新年假期執屋。





上星期四宣萱出現旺角花墟,同一眾大媽在街邊檔揀水仙球,好親民。而她似乎對揀水仙有心得,話咁快就買咗一大盤。

有機會再拍劇

雖然古仔同宣萱有十七年無再一齊拍劇,但好多觀眾都仲好期待呢對熒幕情侶再合作,甚至不時有網民會在討論區提起,有人更提議古仔投資一套在○三年拍過電視節目巡禮的劇集預告《鬼迷心竅》,「真係唔知喎,我連拍過呢套都唔記得。」古仔說。

隨着宣萱加盟下,古仔會否為了好友、為了觀眾出山拍劇?古仔這樣回應:「而家拍劇都係一個大勢,網上睇劇好方便,慢慢(電視劇)個勢會非常龐大,首先唔係出山,第二係要搵一個好嘅劇本,但真係要睇時間性同埋體力係咪應付到,因為始終唔係以前,一日瞓兩、三個鐘都得,我而家每日最少瞓十二個鐘以上。」







○一年大台官方賀年相中的所有藝人,包括古仔、宣萱、阿佘、撈家等全線離巢無人留低。





二○○○年古仔歌迷聚會,請來宣萱做表演嘉賓。







有網友不時要求古仔、宣萱開拍○三年節目巡禮的《鬼迷心竅》。

公認熒幕情侶

有一種情侶叫「熒幕情侶」,鏡頭前一拍即合,產生強烈的化學作用,默契足以令觀眾以為戲假情真。

周潤發 鄭裕玲

七、八十年代,周潤發和鄭裕玲被視為無綫金牌組合、最受歡迎情侶檔,曾合作無數劇集和電影,包括《親情》、《火鳳凰》、《八星報喜》、《我愛扭紋柴》等,其中《網中人》一劇中二人一幕長吻戲震撼全城,其後在電影《花城》中,二人的激情床戲,更令人留下深刻印象。

劉德華 關之琳

憑住杜琪峯系列,鄭秀文和劉德華成為近年最受歡迎的一對銀幕情侶,二人合作過七次,包括《孤男寡女》、《龍鳳鬥》、《瘦身男女》、《盲探》等等,但亦打破不了關之琳與劉德華合作十四次之紀錄,由關之琳第一部電影《群龍奪寶》開始,二人就不斷以情侶檔現身大熒幕,關之琳被稱為劉德華半個情人。

張智霖 佘詩曼

男神張智霖與視后佘詩曼, 00年因合作拍攝劇集《十月初五的月光》,而獲封「世紀情侶檔」,二人更一度傳出緋聞,其後兩人陸續合作,包括電影《跑馬地的月光》、《月滿抱西環》等,去年第七度合作拍電影《洩密者》。

鄭少秋 汪明荃

鄭少秋於演藝圈五十年,與汪明荃合作無間,曾揚言阿姐是他最合拍熒幕情侶,二人於 76年《書劍恩仇錄》開始結緣,其後 78年《倚天屠龍記》,「張無忌」鄭少秋與「趙明」汪明荃的戀情深入民心,自此二人在多齣劇集合作無間,到現時都仲成日以情侶檔現身。

林峯 鍾嘉欣

由合作《溏心風暴》到《家好月圓》,林峯與鍾嘉欣的情侶形象深入民心,二人憑無綫重頭劇《溏心風暴》中飾演「程亮」和「常在心」,令緋聞傳足四年,觀眾一致認定為絕配熒幕情侶。

撰文:娛樂組

攝影:黃志明 

服務提供: Giorgio Armani、 Thom Browne

場地: Belloni by Luxtek(www.luxtekgroup.com

宣萱:化妝: Kamen Leung

髮型: Bluedy Wong@hair culture

古天樂:化妝: Carmen Man

髮型: Dan Tam@Orient 4


鍾意就快D Share啦!