掃呢頁CODE去手機

2018年2月6日 星期二

未到完場都有機!克勤踩完「波車」絕殺翻身 __,克勤,李克勤,

克勤絕殺翻身!李克勤同老婆盧淑儀啱啱去完日本梳乎,過二人世界慶祝喺四個頒獎禮擸咗14個半獎成為「年度獎王」,佢連等咗30幾年,曾經覺得遙不可及嘅「叱咤 ...


克勤絕殺翻身!


李克勤同老婆盧淑儀啱啱去完日本梳乎,過二人世界慶祝喺四個頒獎禮擸咗14個半獎成為「年度獎王」,佢連等咗30幾年,曾經覺得遙不可及嘅「叱咤男歌手金獎」,加埋「至尊歌曲獎」都攞埋,一次過滿足兩個願望。不過佢嘅「零瑕疵」未被網民歌功頌德,有網民嘲「50歲人同班細路仔爭獎」、「唱片公司畀錢換獎之嘛」及「讓關愛座畀克勤啦」等下刪一百字。

自勉感人抵畀掌聲

問心呀,74歲嘅夏雨夠好戲、資歷深過克勤20幾年添,佢咪一樣同班後輩爭做視帝,啲網民係咪咁大細超呀?除咗網民欠克勤一個公道,樂壇何嘗唔係欠克勤一個交代?不過佢唔使人可憐,喺頒獎台度發表奇連伊士活宣言自勉:「大家其實唔係好記得佢有冇攞過(獎),不過如果呢個年紀攞到,大家值得畀啲掌聲。」真係聽到人眼濕濕。

講番嗰班所謂嫌克勤阻住地球轉嘅網民,我Nuts哥覺得,如果班細嘅爭氣,一早收咗克勤皮成日以為啲歌喺YouTube有過百萬點擊就係歌王、歌后,最弊一唱Live就走音加懶音「雙瘀廣播」,試問聲,家陣有邊位自認阿哥、阿姐唱Live時,可以唱贏呢位「人瑞歌手」先?又有邊位聽聲如見人,畀人認得出呀?加上唔係個個頒獎禮都係論資排輩嘅,邊有話阻住唔畀你上, 個獎又冇鑿住你個名,定啲人當咗頒獎禮係公廁,鍾意上就上呢?

轉會華麗轉身

克勤係少數嘅「跨世歌手」,佢喺1986年推出第一張EP,嚴格嚟講喺呢行捱咗32年,人生有幾多個30年嘅克勤,星途亦唔係一條直路。佢曾被前輩睇好成為歌神接班人,但明燈一照下,佢陪完「四大天王」,再接棒陪埋許志安、陳奕迅、謝霆鋒、古巨基跑足全程做「陪跑勤」。如果將樂壇代入球壇,曼聯忠粉克勤就選擇「轉會求生」,一廂情願以為升級變由阿仙奴過檔曼聯嘅A山齊士,可惜「踩波車」變咗前鋒盧卡古,人氣直插人生最低點,「代表作」係1995年開嗰10場個唱,場場「球迷」得一半,灰過踢入10次烏龍球。捱到二度轉「新球會」,又鬧出版稅風波,全隊隊員被「大場」封殺冇得踢,克勤嘅處境如同面臨收紅牌趕出場,好在「命運就算顛沛流離」嘅佢人如其名「克服萬難精於勤」,等到第三次轉會入咗「英皇球會」即刻華麗轉身射個世界波,短短一年幾就贏「英超冠軍」,仲攞埋「神射手」。

人旺氣場就強,身處地球另一邊嘅偶像球星朗尼都感應到,古時就千里送鵝毛,今有朗尼越洋送球衣,仲有親筆簽名嗰種,不過呢份禮不在乎價值,而在乎雪恥! 想當年克勤自製以自己唱片封面為主題嘅相框贈訪港嘅曼聯,有人遺留咗呢份見面禮物喺更衣室,搞到克勤被人笑咗幾年,事隔11年,呢啖「明月照溝渠」嘅烏氣終於可一吐。克勤得到最後勝利,完美引證咗喺樂壇要適者生存外,仲要鬥長命。


來源 source: http://hk.on.cc
鍾意就快D Share啦!