黃子華最後一個棟篤笑，今日就開始優先訂票，不過就有好多網民都話買唔到飛，但就已經有黃牛飛出現，仲炒到萬五蚊一張，而子華神都有留意到呢一個情況，今日就喺facebook貼咗兩條片，表示佢對呢件事嘅憤怒。
黃子華：「大家好，今日發生咗啲事，今日我收到個電話，係我嘅團隊打俾我，喊晒咁樣，我就醒起係喎，今日網上預售喎，係咪因為賣飛賣得唔係幾好呢？賣得唔好都唔使咁喊㗎，哦，原來唔係，係因為黃牛嘅問題。
「好多人喺網上買唔到飛，咁係唔係因為黃牛呢？可以同大家講，亦都有好多好多人係買咗飛，只不過買咗飛嘅人唔會喺網上同大家講『我買咗飛喇』咁樣，但係買唔到飛嘅當然好唔開心，但係又係咪等於冇黃牛呢？係唔係嘅。
「我個團隊點解喺到喊呀？係因為一朝早呢，電台呀，記者呀各方面都搵佢，話已經喺網上，根本呢一排都有，直情係有網站，啲人喺到賣黃牛，問埋佢，嗰啲人話『係有內部渠道』，各位、嗰啲話有飛嘅黃牛，我今日為止都冇飛，我個團隊都冇飛，佢哋已經有飛，因為佢哋有『內部嘅渠道』。
「我覺得係咪應該報警呀？我一路有同我嘅團隊傾呢個問題，係咪應該報警或者報ICAC呢？內部竟然有飛，係點樣得嚟？個問題係我哋冇任何證據亦都冇任何線索可以去舉報。
「o依家黃牛最大問題就係，根據現有法例，唔係完全犯法，我喺度正式同政府提出，大家係咪時候正視呢樣嘢。好多時都有人覺得係奢侈品，好似iPhone咁，所以唔理你，但係到一個地步，當然演唱會唔係食飯咁重要，但好似每一次受歡迎嘅演唱會都係咁嘅時候，民間一個文娛活動，係咪應該要去正視下呢？
「有啲人甚至講『係咪你呀黃子華？你自己又食又拎？一方面正式賣飛，另一方面黃牛又係你…』我喺網上睇到呢啲嘅評論，點解我團隊中有啲人會喊嘅其中一個原因，就係覺得好委屈，我第一次睇到我…其實呢個唔係第一個version嚟嘅，第一次睇到呢啲評論時，我想講嘅時候都有啲激動，係要冷靜返啲落嚟，各位，我冇咁嘅本事，而事實上我可以話俾你聽，我比任何人都覺得嬲，因為每一個表演者，我花咗咁多精神時間去準備呢一樣嘢，每日臨瞓之前我就諗緊嗰句嘢點講呢？未起身一擘大眼、半夢半醒又係諗緊嗰句嘢點講呢？我有句嘢我諗咗成個月都唔知應該係點樣講，大家都好辛苦去準備一個表演，然後就係一啲完全唔需要去付出嘅人，去賣一倍、兩倍、三四五六七倍嘅價錢，然後一啲好長期支持你嘅fans要去承受呢啲價錢，我一路都好接受世界係唔完美，但係咁係太過不完美，係太過離譜！
「所以一方面我呼籲政府係咪應該幫吓手，另一方面，我真係呼籲一啲嘅fans、一啲觀眾，我哋就唔好買（黃牛）囉！唔好買！唔緊要嘅。即係如果我做騷有一大段位、一大堆空，最前嗰啲空晒佢…如果我見到好多場都係咁，咁即係證明好多人可能冇買黃牛喎，可能咪做番一、兩場，補番俾呢啲觀眾囉，不過可能要出年。不過出年仍然有黃牛呢個問題吖嘛！所以呢個係杜絕唔到，當你個法例唔去改變嘅時候…但我都仍然呼籲大家盡量，唔好盡量，就唔買囉！我知道咁樣講又被人鬧，然後我團隊又會崩潰，點解…我哋只係做表演啫，點解會被人鬧？」
精選娛聞，喺晒《娛果》
http://fb.com/appledailyent
黃子華-子華本部facebook連結：
https://bit.ly/2I37eO8
|
鍾意就快D Share啦！
|
|
|
