藝人羅霖以正能量大使身份出席東華三院活動，她稱今日大會主題是慢活自在每一天，她仍在學習如何做到，她說：「各方面都好大壓力，要去沉澱自己，再面對第二日生活。我覺得最重要係身心健康，每日都有感恩嘅心，有困難可以搵家人傾訴，甚至可以搵義工團體同機構幫手。我自己都迷失過，唔知人生方向，會有困難同情緒低落嘅時候，但我會即時祈禱，我有三個仔，為咗佢哋我要堅強生活落去，做人要有目標、夢想同搵到你愛嘅人。」她坦言剛離婚及去年年底也曾閃輕生念頭：「做完嘢返到屋企覺得好攰，會諗應該點行落去，有啲迷茫，但其實咁嘅諗法係好自私，我自己解脫咗，但父母同小朋友就會活喺陰影之下，所以要繼續向前行，我依家好感恩，每日都好健康，如果冇健康就乜都做唔到。」她稱會透過種花、做運動、聽音樂及看書來減壓。
離婚五年幾仲未有偈傾
提到羅霖之前因經濟問題而與男友分手，她澄清從來沒有認定對方是男友，大家只是好朋友：「當然有個人喺身邊關心自己，會容易啲過，我依家一個人不斷咁付出，愛我嘅父母同小朋友，我攬住我嘅仔嘅時候先有啲安慰。」問到是否面對經濟壓力時？羅霖直言一樣想儲首期買樓，但奈何要供三名兒子到外國讀書而不得不打消這計劃，她無奈說：「我年紀唔細，唔知可以做多幾多年，希望劉家（前夫劉坤銘）可以照顧佢哋。依家二仔喺外國讀書，大仔本來喺外國讀咗三年大學，佢決定轉系，會返香港再讀大學，都使咗百幾萬。（浪費咗啲錢？）唔可以咁講，佢都學到好多嘢，心智成熟咗，搵到自己嘅路。佢開心健康就得。（都會供細仔去外國讀書？）未知，佢依家先升中一。前夫有供細仔讀書，但將來唔知。（希望前夫幫手？）當然，佢唔幫嘅話，我支持得好辛苦。其實兩夫妻離咗婚都可以做朋友，有商有量，但過咗五年幾，仲未做到。」羅霖表示要趁空檔練習幾首飲歌到內地登台，因之前一直不夠膽唱歌而推掉不少登台工作。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
