曾經主演過《畫出彩虹》等劇、成為無綫當家小生嘅57歲詹秉熙，今日有報道指佢因為搭上契妹顏仟汶，而同結婚30年嘅太太Sandy分居，報道話顏仟汶舊年同詹秉熙上契為「契兄妹」，上契儀式，太太Sandy都喺現場。
由去年底開始到今年年初，「契妹」顏仟汶不時借故走上詹秉熙屋企，令Sandy好唔鍾意，成日同詹秉熙嘈交。有指Sandy之後仲試過走上顏千汶位於錦田屋企「捉姦」㖭。
報道引述詹秉熙在社交網留言，稱與太太已有共識，大家決定改變身份同方式相處，而佢接受傳媒訪問時，亦承認同太太感情出現問題，但未到離婚階段；至於與顏仟汶嘅關係，詹秉熙稱兩人只屬好朋友，而非第三者。
睇番顏仟汶嘅fb，只見佢不時毫不避嫌大貼同詹秉熙結伴登台、出席活動同去朋友屋企玩嘅相，感情睇嚟相當好。去年12月詹秉熙生日，顏仟汶仲同詹秉熙、Sandy及一班朋友一齊慶祝，派對上顏仟汶仲喺Sandy面前騎詹秉熙膊馬，肆無忌憚。
《蘋果》今日聯絡詹秉熙，佢一個人孭晒上身，話係自己唔好。詹秉熙喺短訊回覆話：「答埋今次之後唔會再回應了，請諒解，我和太太本身已有些問題的，唔關任何人事，係我唔好、係我變咗。處理中、多謝關心。」
顏仟汶就回應話：「冇人敲過我門，冇人上過嚟我屋企捉姦，講完啦。」問及是否介入「契哥」婚姻，顏千汶否認：「佢同太太婚姻問題就俾番佢兩個自己答啦，我同詹秉熙係好好好好嘅朋友。」好朋友會唔會發展愛情？顏仟汶話：「假設性未發生嘅嘢我唔想講啦。」再謂：「你問番詹秉熙啦，佢哋分唔分開或者有冇繼續一齊，你問番佢啦，我唔講喇！」
精選娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|
