位於中環ifc，香港首家以干邑為主題嘅酒吧PONG，今日開幕，請來陳法拉、Cara G.、湛淇清、蔡加讚及關楚耀等出席。早前法拉喺社交網貼咗啲相片，係同啲朋友飲嘢嘅，佢受訪時話之前主要忙緊畢業嘅功課，依家終於完成晒四年嘅課程，感覺好開心，所以上星期同啲同學去咗洛杉磯歡聚：「呢四年嚟大家都一齊返學，一齊相處，十幾個人感情好深厚。」佢仲話聚會當晚大家都忍唔住喊起上嚟，法拉係深受感動：「我哋一路睇住大家嘅轉變同成長，係一路扶持。」
完成學業後，法拉開始準備佢嘅工作：「睇緊劇本，有香港啦、國內啦，美國嘅劇本都有，睇下邊啲角色自己想做0架啦。」咁想做乜嘢角色？法拉又話冇喎：「講真，如果你話想過戲癮嘅話，呢幾年都過足啦，返學演嘅角色好有挑戰性，好似莎士比亞，最辛苦嘅都做過，甚至八十幾歲嘅老人家都演過。同自己真實性格偏差好大嘅角色都演過，所以依家想演番啲同本人貼近嘅角色。」
至於會否再同黃子華合作，法拉都係話要睇劇本先：「我知佢拍電影都好好成績，戥佢開心呀！」至於會否計劃在荷李活打出一片天，法拉就稱：「嗰邊都變得好快呀，依家女性角色多咗好多，而且少數種族角色都多咗，希望自己都有機會」暫時工作基地放喺紐約，「我隻貓都喺嗰邊！」男友都係喺美國長住，法拉不諱言：「我當然都希望見到對方多啲，但都要知道自己工作嘅地方喺邊度。男朋友好支持我，仲話我去到邊度做嘢或者拍戲，佢都可以嚟探我班。」
同場嘅湛淇清話自己酒量都OK，又上過一啲調酒課程，俾男友品嘗，男方亦會「禮尚往來」調酒俾佢試飲。唔怕俾男友灌醉嗎？湛淇清話唔驚，仲話樣樣嘢都好「安全」。至於表姐夫（甄子丹）有冇飲醉？湛淇清稱表姐夫兩公婆都愛杯中物，但就未試過飲醉。
|
鍾意就快D Share啦！
|
|
|
