陳茂波去年升任財政司司長後不時都坐架紅色凌志「FS」官方座駕周圍去，但爭議不斷有嚟！有市民爆料，指周日(前日)傍晚六時幾目擊陳茂坐嘅凌志房車沿著堅拿道天橋行駛時，架車突然切線駛入「巴士專綫」，涉嫌打尖經紅隧過海。市民質疑財爺架車濫用巴士專綫是知法犯法，警方應該要派牛肉乾。不過財政司司長新聞秘書回應時透露，原來財爺座駕係有許可證，就算使用巴士專綫都係合法。記者覺得，咁即係話架車有免死金牌，至於合唔合理，就交畀市民評評理喇。
市民周先生話，事發周日傍晚六時許，佢喺銅鑼灣駕著車沿堅拿道天橋駛經圓型的連接高架路準備入紅隧往九龍，當時他留意到在他左邊即係往北角的行車綫有一架好搶眼嘅紅色凌志房車。他定睛一看，發現係財爺陳茂波的座駕，因佢見到穿西裝嘅波叔坐喺車廂後座好嚴肅睇緊書看書，架凌志就由政府司機揸緊。
周生當時以為財爺是打算去港島東，點知幾秒後，凌志突然向右切線，駛咗入私家車唔可以用嘅「巴士專綫」，即係改為駕車往九龍，跟進凌志再切線駛至周生嘅座駕及另一私家車的前方，然後經紅隧過海，因打尖嘅嫌疑，由於發生喺電光火石之間，周生當時只喺趕得及影兩張相證明此事。周生強調佢覺得：「財爺架車咁係唔啱嘅，因為若果小市民咁樣cut線行巴士專線，會畀警察罰450蚊！」周生話認為法律面前人人平等，就算係政府車，冇急事都唔應該亂用巴士專綫。
記者查過法例，發現《道路交通（交通管制）規例》第12條規定，一般司機（巴士例外）除非是要避免車禍或要遵從警員指示等特殊原因，否則一概不得駛進巴士專線，違者可罰款二千元。
不過當《蘋果》向財政司司長新聞秘書查詢後，佢嘅回應係事件只係一場誤會。佢承認財爺嘅座車周日往九龍時，真係有用過堅拿道天橋嘅巴士專綫，之但係由於「財政司司長坐駕領有運輸處署發出的許可證，在有需要時可使用巴士綫」。換句話講，財爺架車冇犯法。
發言人咁樣答，記者都駁佢唔到，不過呢件事令記者知道原來「高官有特權」呢句話係真嘅。睇番剪報，其實財政司司長陳茂波及其鮮紅色凌志「FS」車牌座駕已唔止一次惹起風波，去年3月它被發現違法停泊在影線引起爭議。到咗今年4月23日，陳茂波又坐呢架紅色凌志出席殉職警員林海雲的喪禮，被質疑對死者不敬，陳茂波其後曾透過新聞秘書道歉，強調絕無不敬之意。
陳茂波自己則曾多次觸犯交通條例。2013佢喺灣仔因沒有打燈下切綫與的士碰撞，被票控不小心駕駛，第二年陳茂波經代表律師在庭上認罪，控方當時揭示咗陳茂波有7次交通案底，包括一次不小心駕駛、三次超速、一次越過雙白綫或連續虛綫、一次沒有遵守交通燈號及一次行車時使用手提電話嘅記錄。
你敢爆，我敢獎！ 即Call《蘋果》24小時爆相爆片熱線：63836568
| | | |
| | | |
| | | |
|
鍾意就快D Share啦！
|
|
|
