今日好多藝人都喺社交網絡上洗版式歌頌母愛嘅偉大，不過唔係每位媽咪都咁開心，所謂家家有本難念的經，好似吳綺莉，與囡囡卓林經歷幾許風雨。
早前卓林與女友Andi喺加拿大流浪，仲拍片放尋父，讓中外傳媒廣泛報道。(相關新聞﹕https://bit.ly/2IaeKet)最近卓林好似「失蹤」一樣，冇晒消息，今日母親節，吳綺莉有感而發喺微博貼上一張個人舊照，留言﹕「反思，要令自己由一個潮州婆，變成一個上海妹，活到老學到老。」之後再轉發經理人艾文貼文，當中提到「人最大的成長就是原諒和接受父母的不完美，願天下母親接納孩子的不完美，也願所有子女接納母親的不完美。」
問到點解要反思？吳綺莉今日短訊回覆《蘋果》時話﹕「微博不是我管的，我內地經理人管的，不好意思你告訴我，我才見到，不講了，謝謝你。」再追囡囡返港了嗎？有同你講母親節快樂嗎？佢話﹕「不好意思不講了，大家節目快樂。」
另外，成龍今日喺安徽出席「成龍-大美中國‧古民居復建區-奠基儀式」活動，係自卓林拍片尋父後首度現身，吸引中港台逾百傳媒採訪。其間有人問成龍知唔知女兒搵佢？成龍笑住用雙手揞住耳仔，唔知係真聽唔到定扮聽唔到。之後再問係咪買咗私人飛機？佢都係冇回應，就由十幾個保安陪同上專車離開。
成龍在台上發表講話時好大感觸，表示母親係安徽人，而今日又係母親節，感覺有如帶咗媽媽返到老家一樣。被問為何有修復古木嘅概念？成龍話廿幾年前，亡父曾經想過返北京住，但當時一個四合院都好貴，現在一億都買唔到，當時修屋嘅老師傅提議佢買舊房子修復，將五、六幢放埋一齊變成一間屋。
精選娛聞，喺晒《娛果》 http://fb.com/appledailyent
|
鍾意就快D Share啦！
|
|
|
