元朗橫洲公屋發展項目備受爭議，議會陣線立法會議員朱凱廸就係憑「橫洲」打響名堂，成功進身立法會。橫洲發展本應係朱凱廸嘅「食糊」位，但有橫洲三村嘅村長踢爆，指去年朱凱廸仍擔任執委會委員嘅土地正義聯盟(土盟)，以及同土盟關係密切嘅橫洲綠化帶發展關注組(關注組)，竟要求村民參與聲援反新界東北發展案改判在囚嘅人士，令村民極為反感，已經紛紛與之割席。
近日發展局加強清拆收地嘅補償同安置安排，關乎安置問題嘅橫洲三村，即永寧村、鳳池村及楊屋新村再次成為社會焦點。不過，同一年半前唔同，朱凱廸乃至土盟同關注組都未有好似以往咁，高調陪同橫洲村民出來回應，反而係村民下星期自行召開記者會交代立場。村民同朱凱廸為首嘅土盟、關注組如今形同陌路人，導火線原來係同反新界東北案有關。
有涉事三村嘅村長承認，大部分橫洲村民已經無再同朱凱廸一夥聯絡，原因係認為對方一心只係想「煲起」個議題，根本唔係幫村民。最辣㷫村民嘅，係關注組竟然要求佢哋出席聲援反新界東北案改判在囚嘅人士，村民當然唔肯出席啦，亦開始感到朱凱廸一夥只係借「橫洲」兩字做「政治騷」，更甚係只顧鼓吹「不遷不拆」，形容雙方已經「割席」，只有四、五戶村民仍然留喺關注組內。
村民明言割席，朱凱廸接受查詢被問到有冇要求村民參與反新界東北案示威時，只係話自己已經唔係土盟嘅執行委員。至於關注組就承認同村民少咗開會，但就否認同村民不和，更否認要求「不遷不拆」，只係想為居民爭取最好嘅安置安排，強調土盟同關注組只係負責提供資訊，從來唔係帶領村民行動喎。
早前立法會四個議席補選，朱凱廸喺幕後「屈基(逼退馮檢基)」，結果搞到想爭奪九龍西議席嘅民主派姚松炎落敗，已經令佢民望大跌；早幾日佢又發炮批評投票支持財政預算案嘅盟友專業議政梁繼昌、莫乃光同李國麟，如今連橫洲村民都唔妥佢，睇嚟朱凱廸真係火頭處處，都唔知救得邊一瓣囉。
|
鍾意就快D Share啦！
|
|
|
