關楚耀前晚在旺角麥花臣場館舉行「FOCUS演唱會」，相隔五年再度開騷，甫開場大銀幕列出不少以前對他的負評，如「當年新人王，未紅就衰咗」、「衰單咁大鑊，𠵱家咁仲想點呀？」接着他出場唱新歌《求生》，找來幫手rap的MastaMic做嘉賓。其間他唱到跳落台，繞場一周，令現場氣氛十分高漲。
摸腰坐大髀
演唱會上，關楚耀唱到《死亡之吻》時與女dancer大跳貼身舞，先來攬小腿，再而摸腰兼坐大髀等，但動作不算激情。至於他與謝安琪合唱的《四面楚歌》，就找來胞妹Natalie合唱，還介紹妹妹予大家認識：「呢把女仔聲得唔得呀？多謝阿妹同我合唱呢首歌，第一次咁樣出嚟陪我玩。」唱完後兩兄妹擁抱，他搞笑說：「好啦，唔該晒你，返去媽媽度聽歌啦。」當他翻唱方皓玟的《分手總約在雨天》時，自爆歌曲原本是方寫給他的，但最後由方皓玟自己唱，更成為她的代表作。
關楚耀完騷後受訪，興奮說：「好似發咗場夢，籌備咗兩個月，上台唱就好似好快咁，不過我都好享受唱歌。」問到下一站是否到紅館？他說：「我真係冇所謂，其實呢個場啲聲都好靚、好正，我當然想去紅館，但唔可以強求，我係佛系歌手。」
不主張入行
談到胞妹上台合唱，關楚耀說：「我覺得佢唱得幾好，呢首歌有需要有把女聲配合，我就問妹妹可唔可以同我合唱，佢話有聽過我啲歌，我都覺得好欣慰。」他表示胞妹不是想入行做歌手：「我叫佢唔好，最緊要做啲自己鍾意嘅嘢。佢係幼稚園老師，又有自己嘅公司幫人搞event，總之做自己鍾意嘅嘢就得喇！」
採訪：盧妹
攝影：陳俊強
|
鍾意就快D Share啦！
|
|
|
