謝霆鋒於年初被東網率先爆將於明年初舉行巡唱，首站選定發迹地香港，而英皇為相隔19年在港再開個唱的他，早定下周詳計劃，不惜以天價打造演唱會外，首要是解決一圓霆鋒開露天場的心願。據知幾個月前，英皇已分別向香港五大室外場包括大球場、西九、東九、中環海濱活動空間及迪士尼露天場地等，多番提出各種可行方案作緊密「溝通」，不過能容納四萬人的大球場，早前以噪音問題而拒租場，英皇惟有再向其他戶外場跟進，可惜暫時未有落實回覆。
而事實上在港開戶外騷殊不簡單，故近20多年來，除於1994年首位假大球場舉行個唱的譚詠麟，因噪音管制問題，無奈開了三場「細細聲演唱會」，以及2007年許冠傑改為下午騷在同一場地開唱後，一直未有歌手在大球場舉行演唱會。
急謀場地要有氣氛
據悉，英皇為霆鋒開騷事在必行，露天場地未分曉之餘，亦急謀另一對策，有考慮過重回霆鋒首個個唱《VIVA Live》的紅館，可是轉室內場地又遇上新難題，皆因他對演唱會要求極嚴格，要有獨一無二的震撼舞台，音響、視覺效果樣樣也要達國際水準僅是基本原則，他曾揚言開騷條件是：「唔想係一個音樂會，歌迷可以企起身，仲要有美食、有氣氛、放煙火，可容納好多人嘅嘉年華式派對。」更直認在紅館開騷「好悶」，故要順利改登紅館，先要霆鋒首肯。
而霆鋒演唱會情歸何處未定之餘，由年初起他已全力為演唱會蒲頭，除在叱咤頒獎禮以表演嘉賓亮相，掀起全城「跪求霆鋒開演唱會」熱潮外，他暫時推出三首新歌，分別是廣東版的《有火》、國語版的《異想天開》及熱播中的《放肆》，稍後將亮相內地音樂真人選秀節目《中國新歌聲》第三季，跟周杰倫、李健等任導師，之前到台灣的《KKBOX風雲榜》頒獎禮獻唱，而昨晚又孖內地爆紅的師弟陳偉霆，以華人歌手代表跟一眾外國當紅歌手及樂隊，包括Pharrell Williams等參加在北京舉行的《格林美音樂節》。
達唔到要求寧願唔做
霆鋒經理人霍汶希接受訪問時，承認被大球場拒租場：「未到入紙，應該係有諮詢過大球場方面，不過因為未能達到霆鋒要求，所以開騷機會係微啲。」問是否噪音問題未達共識？她直認：「如果音響未達最好效果，似乎失咗開演唱會嘅意義。我哋係明白政府各方面考慮，公司亦會考慮其他場地。」至於重回紅館開騷？她坦言：「世上冇一定㗎嘛！大家好想睇到霆鋒開演唱會，所以全部同事同霆鋒傾緊，紅館都係一個選擇，可能未必達到佢嘅夢想，但對於佢一個咁高要求嘅人，室內係易辦啲嘅，佢要拍好多片做視覺效果，霆鋒話過如果達唔到佢製作上嘅要求，佢寧願唔做，我覺得佢係有預謀威脅緊我哋，講笑啫！（霆鋒肯讓步？）未搞掂。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
