現年70歲嘅姜大偉(John)，多年來都是緋聞絕緣體，惟獨一次，就係John喺94年回流香港拍TVB劇集《再見亦是老婆》，劇中飾演出軌男人，與第三者周嘉玲傳戲假情真，更一度傳出婚姻亮紅燈。多年後，John哥接受商台《一圈圈 星光背後》訪問，輕鬆回應﹕「點解要嬲呢啲？我唔理人哋講說乜嘢，有呢啲傳聞，證明我拍呢部劇演得好。」
John哥直認喺演藝圈多年，承認出現過唔少狂蜂浪蝶，但佢都能夠把持住，與太太李琳琳結婚44年，兩人更是一見鐘情。佢話﹕「我同你講，當年冇狂蜂浪蝶你都唔相信當然有，但幸好嗰時我真係好忙，太多工作喇。我?太太相識嘅時候，我係邵氏，佢係國泰演員，大家本來係唔認識，但佢同我嘅家人就好熟。有一次我哋有個朋友結婚，我哋喺嗰個宴會上認識，可能就係所謂嘅一見鍾情，一發展就發展了四十幾年。我哋係好早結婚，但嗰時怕乜？結就結加上我哋嗰時係奉女成婚，有咗依蘭(大女)就結婚，我又唔覺得結婚會對我有乜影響。」
2011年，太太李琳琳證實患癌，John一直喺身邊照顧太太，佢話早已看透生死：「老婆有病，就算普通傷風咳嗽，我都會擔心，更莫講係初期嘅癌症，絕對係擔心，但老婆反而安慰我。接受化療嘅過程，佢係好痛苦，現在康復，都係因為太太肯接受治療。我哋兩公婆，其實對死亡並唔係好害怕，因為大家都知道人必有一死，分別只係邊個先走。就算離世都好，都唔需要擔心死後放係邊、有冇人去拜祭，我哋嘅想法都一致，死後只需火化然後灑掉就可以喇。」
|
鍾意就快D Share啦！
|
|
|
