劉德華監製嘅電影《掃毒2天地對決》喺啟德郵輪碼頭花費5個多月時間、搭建1:1嘅中環地港鐵站，今日就喺「中環港鐵站」舉行電影宣傳活動，主演古天樂、三哥苗僑偉、應采兒、周秀娜同衛詩雅等等出席。
電影公司安排警車載住「毒犯」劉德華同古天樂現身，眾人更用掃把掃去地上嘅「毒品」。
劉德華同古天樂話自己喺戲中係壞人又係好兄弟，兩人將會喺「港鐵站」有撞車嘅場口。問到二人嘅造型，古天樂話：「保持啲神秘感，總之就長頭髮、有鬚同埋身體有缺陷。」劉德華就透露自己喺電影嘅開頭會紮髻：「好似古裝咁，返到屋企被爸爸問我係咪拍古裝，我仲接髮接左4日。」
問到佢地有幾耐無搭地鐵？古天樂笑謂依家有得搭都唔識路：「入行後無坐過地鐵，10幾20年啦，拍戲都無去過地鐵站，要借都好難。」劉德華話：「我起碼15年無搭過，不過沙士之後有得戴口罩就好啲，有時趕時間過海都會搭去中環，我都想揾個機會再搭下。」
三哥同劉德華鬼馬地說：「你帶埋個女去搭下地鐵囉。」劉德華即扮惡話：「你多事！」期後記者提議三哥帶劉德華女兒去搭港鐵，佢笑謂：「我帶嘅話佢斬死我吖，佢唔離手o架個女。」
劉德華笑指三人之中，三哥最chok。三哥受訪時謂：「我點會chok得過佢地兩個呀？劉生『chok先』，古仔都唔弱㗎，我就chok佢哋兩個囉。」佢仲透露戲中三人會喺「港鐵站」有飛車鏡頭，亦會到真嘅地鐵站拍攝。
三哥仲話自己平日都會搭港鐵，唔會戴口罩：「集郵咪集囉，人哋俾面你先同你集啫。」
周秀娜就自爆曾經喺港鐵搭過龍，因為瞓着咗：「我搭晒全程，梗係瞓啦，點知啲人落晒車我都未醒，好彩有廣播。」戲中佢飾演劉德華嘅前度，佢話：「我都好突然，因為戲中有個10幾歲嘅仔，佢同我咁高，不過拍戲就冇所謂啦。」
另外，早前有小行星以劉德華、古天樂、張國榮同梅艷芳命名，劉德華話自己都係睇新聞先知，佢笑謂：「其實呢啲星星多過人類，係人都可以有自己粒星星。」古天樂就話唔識反應：「無諗過有粒星係我個名，好榮幸嘅，喺星海之中有粒星係我，同家人講下都係好好嘅紀念。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
