娛樂圈又有喜事喇！李亞男（Leanne）3年前告別「處女黨」，嫁給王祖藍，婚後二人都表明會努力造人，終於皇天不負有心人，祖藍昨日趁和李亞男拍拖9周年紀念的大日子，齊齊透過社交網宣佈王家有喜！祖藍更鬼馬開盤：「究竟將來BB嘅高度，係會似我定似阿媽呢？」
現年33歲的李亞男，2015年情人節嫁予比她年長5年，但身高卻矮一截的王祖藍，6年「長短腳之戀」修成正果。婚後二人一直恩愛，李亞男曾因祖藍工作太忙，經常獨守空房一度爆發情緒病並患上驚恐症。祖藍為陪伴愛妻不惜停工，昨日是二人拍拖9周年的紀念日，祖藍故意選在這天宣佈王家有喜，的確很有心思。
護胎唔敢亂食
提到與老婆昨日同時公佈喜訊，準人父王祖藍開心地表示：「首先好感恩，可以喺拍拖9周年紀念日去宣佈呢件事，我哋拍拖嗰時係2009年，咁啱9年後有個小朋友，咁希望所有嘢都可以長長久久啦。亦都好感謝上帝，幫我哋安排晒所有嘢都喺計劃入面進行，之前應承過Leanne搬出嚟二人世界後，過兩年左右先有小朋友，𠵱家真係實現到，真係好感恩。」
祖藍又笑指公司好旺丁，事關公司先後有兩個員工懷孕。他說：「𠵱家計埋我老婆就三個人，咁如果想生B，入嚟我公司做喇！」祖藍又叮囑幫忙「睇住」老婆，笑謂：「做媽媽真係好辛苦㗎，佢為BB付出咗好多，又睇書啦，又改變自己飲食習慣啦，所以麻煩大家照顧吓佢啦。」祖藍又拿BB的身高開玩笑說：「大家最近除咗睇法國定克羅地亞贏，我建議開多個盤，就係究竟將來BB嘅高度係會似我定似阿媽呢？相信都幾啱用嚟打牙骹戰。」李亞男接受訪問時則表示：「好開心終於做媽媽喇！第一時間知道嗰陣真係好驚喜，同埋有啲唔敢相信，因為我哋雖然係plan今年做爹哋媽咪，但冇諗過咁快就實現到，真係好感恩。」
向鍾嘉欣取經
問李亞男想生B仔還是B女？她坦言與老公一樣沒有所謂，因為仔女都鍾意，最重要是BB成長過程夠健康，開心快樂。李亞男續說：「已經同Amazing Esther嘅好姊妹分享呢份喜悅。我有向鍾嘉欣同宋熙年取經，問定佢哋有乜嘢唔食得，同埋可唔可以做運動，真係好多好多問題想問，始終自己冇經驗。」
現在是懷孕初期，李亞男為BB設想，透露目前在飲食方面都好小心及節制，除了比以前少吃甜品，連咖啡都飲少了，她希望好好照顧自己，爭取多一點時間休息，令BB可以更健康。
採訪：魯吉
攝影：朱志聰、梁繼光
|
鍾意就快D Share啦！
|
|
|
