車淑梅直斥19座小巴梯級設計有問題！
電台節目主持人車淑梅喺社交網透露遇上「小巴驚魂」，不過佢唔係遇「針插座位」，而係搭嗰部19座小巴，喺車門上落位度，有一級原意係方便長者上落嘅梯級，但因為呢個梯級係斜梯型，面積唔大唔細，所以可能成為一個上落客嘅「中伏位」，而淑梅嗰日差啲因為呢個梯級而跌親，佢留言話：「差點被這小樓梯摔倒，大家上落車時一定要小心啊。」
該改良設計
淑梅接受東網訪問時表示多謝大家關心：「我冇事，但落車時屈一屈、扭一扭，要企喺度成分鐘先夠膽再行，因為係痛囉。其實嗰一級上車時係好明顯嘅，因為一定會睇住嚟行，不過落車時好多人跟尾落，你一定會想行快啲，唔好阻住人，但嗰日我一落，冇耷低個頭，平時16座（小巴）一落就落，但（19座小巴）嗰一級又匿埋側邊位，你又睇佢唔到，於是乎我半隻腳踩落小級，再成隻腳跣咗落去大級嗰度，差啲『燉』落去，好在側邊有啲人、又有扶手，我立即捉住，否則真係好醜怪同會受傷。我希望有關方面快啲糾正，係錯咗（個設計）！曾經試過有人受傷，點解仲唔改善？唔想再有人受傷囉，可唔可以將黃色嗰個梯級延伸到有成個樓梯級，變為有三級樓梯，因為兩蚊車資，好多長者都會選擇搭嚟周圍去嘛。」
來源 source: http://hk.on.cc
|
鍾意就快D Share啦！
|
|
|