謝君豪大後日將夥拍劉嘉玲同秦沛（Paul哥）演出舞台劇《奪命証人》，呢次亦係繼《杜老誌》後，謝君豪再度同嘉玲合作。謝君豪日前喺尖沙嘴接受訪問，佢話同嘉玲已有默契，同Paul哥就係首次合作：「我細細個睇Paul哥做戲大，唔單止我，劇組入面個個都係，睇吓今次合作有冇機會偷吓師。」
法庭偷師
呢個劇由毛俊輝執導，謝君豪都好緊張：「今次涉及大量法庭戲，事前要做多啲準備工夫，因為我係飾演一個被告，需要親自去法庭參考究竟係點樣運作，律師係點樣講嘢，證人同被告喺盤問下會出現啲乜嘢情緒同反應。」
近年謝君豪都盡量保持每年喺香港做一套舞台劇，其餘嘅日子都會留畀家人同接拍內地劇。返內地拍劇要離港幾個月，佢話忍受唔到離開太耐：「我通常一個月唔夠就返嚟一次，始終都掛住屋企。」佢坦言電影、電視劇同舞台劇三揀一辦唔到，始終接戲嘅原則有兩個：「首先角色要自己鍾意，如果鍾意就唔使考慮。其次就要諗當時等唔等錢使，如果等錢使，淨係對片酬有感覺，但角色又冇乜感覺，就要諗辦法令自己有感覺，呢個係專業演員應該有嘅態度。」
撰文：馮仁昭
場地提供：Dada Bar+ Lounge@ The Luxe Manor
|
鍾意就快D Share啦！
|
|
|
