受躁鬱症困擾的歌手盧凱彤（Ellen）昨日突然在跑馬地寓所自殺墮斃，終年32歲。早年她曾憶述2013年與好友旅行期間突然感到寂寞孤單，返港後長期失眠兼力不從心，最終在伯樂黃耀明勸喻下求醫，證實患上躁鬱症及人群恐懼症。憑畫抒發內心，Ellen又曾在訪問中表示患病期間創作逾一百幅畫，直言「畫畫醫好自己」。
用一年時間借藥物控制及心理輔導
她在訪問中提到當時病發的徵兆包括出現幻聽、幻覺、手震、口齒不清、眼神恍惚，甚至踢牆及兜巴星自殘，亦試過半夜三時半獨自搭巴士漫無目的周圍遊，更萌生退出念頭。Ellen經過一年藥物控制及心理輔導，成功走出陰霾：「有躁鬱症嘅人每一日諗法係有危險同埋控制唔到自己，我覺得最辛苦唔係病，而係開始食藥，因為啲藥係要調校，我用咗九個月時間先調到依家可以咁清晰傾偈。依家每日要食五種藥，當時有傷害自己，喺我好躁嘅時候試過用腳踢牆、摑過自己。雖然唔係重傷，但最大係心理上傷害同面對最黑暗嘅自己。喺2013年年尾發現有個心結同鬱結要去打開，可能一路以嚟對自己要求太高、苛刻，加上執着、衝動同超級好勝。」
正能量面對 承認未斷藥
「我嘅思緒、混亂係嚟自幻覺同幻聽，會聽到有聲音同我講嘢，同我講『你要行去邊、你唔好食嘢、你做啲乜嘢』，會見到一啲唔存在嘅人，所以唔敢出街，每一日朝早六點半起身，七點半自己入赤柱聽海浪聲，因為唔想聽到其他聲音。想話畀大家聽，其實我去分享呢個躁鬱症係一個正能量，大家應該要去咁樣睇呢件事，每個人都有負面思想，係醫得好。食藥唔代表未康復，因為呢啲藥唔同傷風感冒，唔係停咗藥叫康復，醫生話要食番兩、三年。」
患病期間創作逾一百幅畫
勇敢面對自己的Ellen當年就出書詳盡講述戰勝病魔過程，並曾舉行患病期間所畫的一百幅畫作慈善畫展：「依家可以完完整整克服到呢個病，比起世界上任何嘢都更難，所以當時我紋一個類似我畫風嘅紋身。以前咩都要收埋，依家可以豁出去，係畫畫醫好自己，原來可以使用唔同工具、方式去抒發自己。當音樂表達唔到自己嘅時候，其實仲有其他嘢揀。」
|
鍾意就快D Share啦！
|
|
|
