【新增回應】
今年4月熊黛林（Lynn）榮升做媽咪，為老公郭可頌（Ken）生咗一對孖女，轉眼一對小公主已經100日Lynn仲趁呢個機會，向大家宣佈孖女英文名為Kaylor同Lyvia，跟隨父母英文名嘅頭一個英文字母。
噚晚，Lynn穿上紅色貼身裙，同老公喺香港遊艇會筵開15席，為一對小公主搞百日宴，出席嘅賓客有甄子丹老婆汪詩詩、名模琦琦、楊千嬅老公丁子高及公關鄭紹康等，當然唔少得Lynn嘅經理人Kim，同埋郭可頌嘅家姐郭可盈和姐夫林文龍。
賓客之一嘅鄭紹康，接受《蘋果》訪問，佢話︰「一對孖女好精靈活潑，成晚都冇瞓覺，媽咪仲幫佢哋換衫。」講到新手媽咪Lynn，佢話︰「佢好犀利，咁快就收晒身，Lynn都準備復工。」問到姑媽郭可盈送咩禮物畀孖女，鄭紹康話唔清楚，不過佢最開心見到郭可盈兩公婆，佢話︰「我問佢Jessie（刑偵角色）嘅正確讀音，佢好鬼馬讀成『車匙』。」
現場以粉紅同粉藍色布置，沿住樓梯掛滿波波，至於回禮禮物，Lynn好有心思以粉紅、粉藍色手袋形盒子裝住樽裝糖果。
Lynn今日回覆本報，講到噚晚為孖女舉行百日宴，佢話忽然覺得孖女大過咗好多：「過咗一百日，扭計都冇咁多，之前佢哋鐘意扭抱瞓，又一日喊到黑，o依家突然少咗，又可以自己上床玩玩下就瞓，反而令我有少少失落感，好似大個咗唔需要媽咪不過都好開心，佢哋越嚟越大個，會有更多嘅交流，o依家氹佢識笑，我已經好開心好滿足。我哋全家人都好開心，親戚所有人好鍾意好錫佢哋，好多人成日嚟探BB。」
要同一時間湊兩個BB真係唔容易，但呢位新手媽咪就好好彩，佢話：「媽咪過咗嚟幫我手，奶奶又成日嚟幫手湊，壓力冇咁大，有家人支持，佢哋好錫我，一開始好辛苦，一晚起幾次身，仲要輪住嚟，一個食完另一個又要食，初生BB兩個鐘就要餵一次，真係好辛苦，冇覺瞓，瘦咗好多。」
問到爸爸郭可頌有冇幫手湊孖女?Lynn體貼話：「有幫手湊，但佢工作太忙，有兩個女更加要努力去做嘢，喺屋企見到我忙就會主動忙手照顧，佢已經盡咗力。不過老公主外，搵錢就得，我去打理頭家，唔使佢落手落腳去湊，同BB玩就好」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
