【娛樂人物】世界拳王周比利年屆60歲，曾當動作演員的他曾與不少武打巨星，包括成龍、洪金寶及李連杰等對打，息影十多年的他開拳館教拳作育英才，近日終重出江湖拍戲。周比利現在身形魁梧，其實幼年時身子孱弱，他日前接受《蘋果》專訪透露周母更曾想墮胎，就連醫生也說：「生出嚟都唔會長命。」至11歲開始練拳，扭轉了他的一生，成就一代拳王。
採訪：馮國康、何永寧
攝影：陳俊強
周比利，原名周建康，改這個名字，皆因家人希望他可以健健康康、快高長大。一代拳王日前在自己的拳館接受《蘋果》專訪，他原來自小就被家人當女生養：「屋企總共有七兄弟姊妹，我同對上阿哥爭三、四年，阿媽生阿哥時已經諗住唔生。有咗我都唔知，可能當自己肥，到發現嘅時候想落我，但落唔到。醫生當時同阿媽講，生出嚟都唔會長命，因為你落過，所以自細屋企就當我女仔咁養。」
直到11歲，周比利貪得意跟哥哥去拳館，對打拳產生濃厚興趣，加上遇到叔叔的一位讀營養學同學，糾正他們一家的錯誤觀念，他的命運才來個大逆轉。他憶述︰「個營養師話『你哋唔可以咁對佢，當佢死硬咁，佢𠵱家發育，要畀啲有營養嘅嘢佢食。要每日食麥皮、芝士、麵包兼飲鮮奶，強化佢身體同做運動。』就係咁！阿爸、阿媽畀我跟阿哥練拳，加上發育又食得好，自信心返晒嚟，開始周圍再搵武館學武。」
| | |
老虎仔從未打輸過
之後，周比利拜師李鵬師傅，全力打擂台競技，對手全部是比自己高大的外國人。他在79年跟隨師傅李鵬由加拿大返港，成為第一代打自由搏擊的拳手，85年更贏過WKA自由搏擊世界冠軍，他說打自由搏擊未輸過：「贏，不過打得都好辛苦。以前我外號叫老虎仔，𠵱家冇咗個『仔』字就咁叫老虎，遲啲要叫老老虎。」
當年武打片流行，洪金寶邀周比利拍戲，他二話不說答應，結果闖出另一番事業：「有啲武師問我係咪簽咗大哥，我話唔係喎，咁掂啦好多人想搵你拍呀，於是留咗喺香港發展。」在影圈發展近二十年，拍過數十部電影，在千禧年代息影的他，最近出山再拍電影《黃金兄弟》，今次合作的都是舊拍檔，包括在《98古惑仔之龍爭虎鬥》的徒弟錢嘉樂，錢嘉樂今次既是導演也是武術指導。
對打倉田動作犀利
復出拍戲，周比利笑說是要過戲癮，沒有任何壓力，多年後再拍，問到與過往有何差異，他說︰「我諗睇吓邊個武術指導，𠵱家輔助多咗，但舊派嗰啲，仲係拳腳多啲。你睇吓錢嘉樂導演呢套戲，我同倉田保昭打十幾個動作，一個鏡頭過，動作都好犀利。」
採訪時，周比利示範踢腿、拳擊、打沙包等動作，依然動作敏捷，年屆60依然寶刀未老。不過鐵漢柔情，在擂台上戰無不勝的他，在生活也有一個唯一可以打敗他的人，就是他太太Amy，提起太太，他即甜絲絲：「我太太就係事頭婆，我去邊度都要帶埋佢囉！」的確每次周比利由加拿大回港教拳，太太都會同行，在拳館打點一切。雖然膝下無兒，但周比利不覺遺憾：「冇小朋友，後生嗰陣唔得閒，成日周圍去。初初諗承受唔到個責任，又打拳、又拍戲，到後來想過要，但諗吓搞個出嚟，不如兩公婆周圍去享受人生，都過咗生小朋友嘅時段。」
場地提供：周比利拳館
|
鍾意就快D Share啦！
|
|
|
