現年50歲的馬德鐘在12年轉戰內地，有健康身體先可以接受更大挑戰，馬德鐘坦言半年前開始茹素，再配合適當運動，身形更弗爆，歸根究柢原因只得一個：「我希望事業可以再衝一次，不論內地或香港嘅電影都可以再有新嘗試。」
撰文：陳杰
攝影：林賓尼
馬德鐘12年離開無綫，六年間三度為電視台孭飛拍劇，算是飲水思源，馬德鐘日前在銅鑼灣接受《蘋果》專訪時，表示鍾意現時的自由身合作形式，是否因為以前劇接劇，變成「血汗工廠」？他說：「冇辦法，以前都要喺一個好多實戰機會地方去充實自己，電視台畀好嘅平台我哋不停去實習，角色上我哋做完一，又去做二，再去做三，演員要好快去適應唔同環境，打穩基礎，所以當我有機會出去外面發展，會發現真係好快手，樣樣都熟咗。」
眼前的馬德鐘狀態的確比當年好，原來他已經茹素半年，在飲食習慣影響下，消瘦了十多磅，整個人感覺好fresh，馬德鐘說：「既然人到中年，應該要食得健康，所以咪改變飲食習慣，由多菜少肉開始，無論喺屋企定喺內地開工，我都會為自己炮製素餐，希望食得健康。」
遠離肉類
對於開始轉食素，馬德鐘說：「其實都係想身體健康啲，食入口嘅嘢最重要，唔係完全停晒，有時要出去應酬，同朋友聚會，揀選嚟食，基本上唔食肉，有時食少少海鮮。唔食肉，各方面配合，令自己身體狀態同皮膚都健康啲同好啲，咁多好處，諗唔到點解唔咁做？」
聲稱是「牛魔王」、無牛不歡的馬德鐘，一下子要戒食心愛的食物，他坦言不能操之過急，要逐少逐少減：「人嘅慣性，一下改變幾辛苦，點令自己成功，咪做啲好好食嘅健康食品。素菜都畀到足夠體力，我最鍾意食紫洋葱，不論生食熟食，我無論煮乜嘢都會加，有時喺內地拍戲，我返酒店都自己買嘢煮，有時涼拌，有時炒個意粉，煮嘢食係樂趣。食多啲蔬菜水果，腸嘅負荷唔使咁辛苦，食完第二日唔使好多嘢頂住個肚，起身個人都醒唔到。」
戒掉咖啡
不單食物方面有改變，馬德鐘連咖啡和酒類飲品都戒掉：「飲咖啡要加奶，啲牛奶都由牛度出嚟，所以索性戒埋。酒類其實最致肥，除非係應酬，其他時間都盡量係滴酒不沾。」結果再配合適當運動，身形更弗爆，他笑言：「喺呢半年，我嘅體重輕咗十幾磅。」
近年馬德鐘以自由身方式和不少團隊合作，他坦言：「我𠵱家好開心呀，自由啲，自己揀選唔同嘅嘢，可以同唔同平台、唔同嘅團隊工作，基本上未試過重複同一個團體合作，自然會學識到唔同嘅嘢，眼界大開，返到無綫，我可以用我純正廣東話演繹角色，身邊合作拍檔，台前幕後都係熟嘅人，模式會習慣，大家多咗有默契。」至於會否嘗試做導演？他說：「有咁諗，做導演太辛苦，要兼顧嘅嘢好多，𠵱家呢個時間，我希望事業可以再衝一次，不論內地或香港嘅電影都可以再有新嘗試。」
囝囝得真傳
馬德鐘與太太張筱蘭於98年誕下了兒子馬在驤（Xiang），本身是游泳健將，加上又遺傳了爸爸的高䠷身材，成為最受注目的星二代。雖然Xiang有興趣入行，但不可以忽略學業，日前馬德鐘談到工作的安排，他說：「有得篩選當然最好，但搵錢都重要嘅，囝囝喺澳洲讀書，要搵學費。如果賺錢唔重要，點會一個演藝行業養活我一家人，亦要尊重行業，我可以用興趣搵食，好感恩。」
不知是否想跟86歲的胡楓（修哥）一樣永不言休？馬德鐘笑說：「暫時係咁諗，修哥有魄力，有活力，好令人佩服，有個心理狀況同心態好緊要，佢係好榜樣。」他還說：「其實做乜嘢角色都冇所謂，我只係想每一套戲可以唔重複演角色，多啲發揮空間已經好滿足。」
場地提供：The Stadium（CWB）
|
鍾意就快D Share啦！
|
|
|
