陳貝兒為大台拍攝節目《嫁到這世界邊端2》下周一推出，佢呢排日日喺Instagram貼出返電視城做剪片同配音工作，成日都忙到「甩碌」，噚日中午有讀者報料，指喺跑馬地養和見到貝兒去睇急症，佢除咗戴住太陽鏡同口罩，佢都一臉憔悴。貝兒仲係咁按住個肚，護士即安排佢坐輪椅。
大約5點幾，《蘋果》接報去醫院，見到貝兒由工人同保險經紀陪同左右，醫護人員叫佢入去打針同檢查，跟住再坐輪椅出嚟等候。醫護人員同貝兒傾咗幾句，佢係咁用手機打Whatsapp，現場聽到，貝兒氣弱游絲咁同保險經紀商量、原來醫生建議貝兒要留院，但醫院就爆晒冇房，所以貝兒要苦惱轉院安排。佢哋搞咗大約半粒鐘，貝兒就由工人同保險經紀陪伴下，離開醫院，準備轉院。
貝兒等由工人同保險經紀傍實，佢哋一行三人坐的士轉到嘉肋撒醫院，貝兒落的士，行路都冇力，工人就扶實佢，護士即安排了輪椅出嚟，推貝兒去登記入院。貝兒今晚回覆傳媒，佢攰爆話：「今朝起身好肚痛，痛到落唔到床，仲未知乜嘢事，要留院檢查，多謝關心。」
貝兒為《嫁到這世界邊端2》獻出好多，今年7月去歐洲外景時都因中暑入院，要留院打吊針。佢嗰轉去咗瑞典、法羅群島、波蘭、希臘同土耳其合共5個國家尋找異鄉人妻，全程40日，總共要坐19程飛機（新聞連結： https://bit.ly/2my61pk ）。當行程去到第37日，貝兒抵唔住土耳其41度全日外景中暑，半夜要入院吊鹽水（新聞連結： https://bit.ly/2NLAITv ）。貝兒返港為呢個節目做後期又忙到爆，壓力爆煲入院，可謂禍不單行。
精選娛聞，喺晒《娛果》
http://fb.com/appledailyent
| (採訪、攝影：吳耀輝、徐錦池) | | |
| |
|
鍾意就快D Share啦！
|
|
|
