41歲視帝陳展鵬今日迎娶28歲嘅16年落選港姐單文柔，佢哋舊年被被《蘋果》踢爆戀情（新聞連結： http://bit.ly/2OWcoTk ），「鵬單戀」今日修成正果，共諧連理。
一對新人早前到英國拍攝婚紗照，郎才女貌好有夫妻相。展鵬今朝7點20分就精神奕奕抵達中環四季季酒店，為婚事做準備，陪同佢有兩名圈外友人，估計係兄弟團成員。大約8點左右，「黑妹」李麗霞都出現，佢見到記者猛話好開心，佢係嚟幫展鵬打點一切，參與接新娘儀式。
8點20分左右，陳展鵬着上中式禮服，中山裝造型，胸襟前繡有龍圖案，佢拎住花球同wedding planner及兄弟團落咗嚟影合照，展鵬全程心情大靚，表現風騷，擺晒甫士。20分鐘後，姊妹團成員、單文柔嘅同屆港姐劉穎鏇坐的士趕到，佢下車都箭步走入酒店。據知，接新娘儀式喺9點開始。
大約9點30分，着紅色旗袍嘅單文柔撓實陳展鵬臂彎落咗嚟，笑容滿臉，佢哋由酒店步出，姊妹撐住紅傘，記者要求佢哋影相，但佢哋冇停低做訪問，不過就有企出嚟影相，親友同兄弟姊妹團就坐24座旅遊巴跟住花車，佢哋由酒店出發到中環9號碼頭，眾人登上一艘遊艇開始海上派對。一對新人由酒店出門時，有一對男女疑似係單文柔父母。
新郎陳展鵬噚日喺Instagram貼咗中式禮服相後留言：「著古裝衫著得多，但今次感覺好唔同，期待明天的來臨！」新娘單文柔亦同係貼裙褂相後留言：「明天就是！明天之後就多咗一個身份一份責任。期待成為陳太呢刻，我會努力做好呢個角色。呢2日喺街都撞到好多朋友，你哋比我還要高興，好多謝你哋嘅祝福。」
精選娛聞，喺晒《娛果》
http://fb.com/appledailyent
| (採訪、攝影：畢紹基、吳耀輝) | | |
| | |
|
鍾意就快D Share啦！
|
|
|
