歐聯驚爆假波醜聞！據法國權威媒體《隊報》報道，歐洲足協正調查上星期歐聯分組賽C組、巴黎聖日耳門6比1大炒貝爾格萊德紅星嘅賽事，消息指有紅星嘅高層喺賽前向博彩公司落500萬歐元重注，買紅星將會以5球落敗，最終巴黎聖日耳門憑尼馬連中三元大勝6比1，幫該位紅星高層大賺一筆。
雖然歐洲足協拒絕透露事件詳情，發言人只係話：「為咗唔會阻礙調查，我哋從來唔會評論疑似假波或調查中嘅假波，直到有任何結論出現前，我哋唔會評論個別Case。」不過，法國金融檢察部門PNF就證實收到歐洲足協通報，已經就事件進行調查。
消息曝光後，塞爾維亞老牌勁旅紅星同法甲班霸巴黎聖日耳門分別發出聲明，否認有參與違法行為。巴黎聖日耳門嘅聲明表示：「對於塞爾維亞出現嘅異常投注、令球會疑似參加咗一場假波，我哋都感到震驚。球會堅決否認有任何不當行為，亦強調球會並非檢察部門調查目標。」
紅星喺歐聯C組首仗爆冷0比0守和意甲勁旅拿玻里，不過第2場作客巴黎聖日耳門就變得不堪一擊，全場畀巴黎聖日耳門有34次射門機會，而且只得26%控球率。紅星喺今個月25號將會作客利物浦。
東網體育FB同你追實體壇每個精彩時刻！
http://bit.ly/2ecTF2A
來源 source: http://hk.on.cc
|
鍾意就快D Share啦！
|
|
|
