朱慧珊絕對是娛樂圈的異類，花旦們個個爭崩頭想當女一，亞姐出身的珊姐卻有劇不接，寧願轉做主持，之後劈炮過檔無綫。無綫要她拍劇，她又即走返娘家。全因珊姐拍劇拍到驚，試過捱夜拍劇辛苦到喊，自怨自艾好淒涼，人人擔心戲份不夠爆、不夠激，她就連錫錫對手也不肯，更與「至高無上」的導演有拗撬。
撰文︰祖李
攝影︰林德雄
朱慧珊的演藝人生，從來都是無心插柳的。85年陪朋友參選亞姐，豈料友人被out，自己卻得了第四名，更儍更更入了娛樂圈，拍劇就做女主角，演出劇集包括《天橋》、《上海風雲》及《黑夜》等，後來轉職做主持又被賞識，節目從不間斷。
難頂親熱戲
珊姐自言野心不大，甫出道就做劇集女主角，她不但沒有飄飄然，反而以「痛苦經歷」來形容︰「喺亞視頭一、兩年拍劇最多，但就俾呢啲痛苦經歷嚇怕咗。記得有晚喺龍翔道拍通宵戲，放消夜時我坐喺公園度拎住碗雲吞麵，一路食、一路喊，點解半夜要坐喺路邊食麵咁慘，冇得瞓又攰。」
除了捱夜，最難受是要拍親熱戲，珊姐說︰「當年親熱戲只係掂吓，記得拍《天橋》有場戲講我同老公喺房傾偈，之後要錫一啖，我死都唔肯，同導演講挨吓咪得囉。導演都堅持要我錫，最終我企硬冇錫，後來諗深一層，覺得自己好冇演員道德。可能入行年紀細，加上冇受過演戲訓練，當年選美都冇諗過入行，根本冇心理準備，所以後來索性唔拍。」
為了避拍劇，珊姐寧願劈炮離開亞視，89年轉投無綫做主持，十年後又因拍劇被迫返娘家，她說︰「喺無綫十年，後來高層下令主持拍埋劇，藝員科同我傾續約時亦強調呢點，咁啱亞視又斟我返去做《今日睇真D》，拍劇始終唔係我專長，咪走囉。」珊姐在無綫僅拍過《兄兄我我》及《橫財三千萬》兩套喜劇，沒親熱戲的。
難得珊姐身在娛圈，仍然不會為五斗米折腰，不過提起她與第二任丈夫、富商賈鈞鵬，珊姐卻認為釣金龜「冇問題」︰「很多人以為選美出嚟好多人追，當時我冇㗎，可能因為深閨圈子細，老公係朋友聚會認識。釣金龜？冇問題喎！條件好嘅女仔搵高富帥唔係錯，不過用乜方法達成願望，或者揀對象只睇錢，咁又唔啱嘅！」
| | 朱慧珊憶述拍亞視劇集《天橋》時，為了這幕親熱戲與導演起爭執。 | 朱慧珊過檔無綫，拍《兄兄我我》沒有親熱戲，朱慧珊說演得開心沒壓力。 |
想研究網紅
珊姐的夫妻相處之道是互相尊重︰「我當老公係親人又係朋友，同佢好多話題，有時會製造驚喜令佢開心，兩個人一定要咁至維持得耐。事業方面我算懶，後生就梗係要工作，但去到某個年紀，都要有心理準備退落嚟。」話雖如此，珊姐至今仍享受工作，剛播出的亞視節目《香港追擊搜》，珊姐表示既刺激又有挑戰性︰「我哋只係想做一個節目緊貼社會，主要講民生，我𠵱家好有興趣研究KOL同網紅，究竟佢哋嘅吸引力從何而來。」
其實，52歲的珊姐至今仍然愛嘗試新事物，她說近日學懂gel甲，試過整整一天弄指甲︰「扮靚係女人永遠嘅工作，一定唔可以懶，好多女人以為扮靚係為丈夫或者男朋友，其實扮靚係為自己。人要不斷進步，進步除咗工作上，儀容都要與時並進㗎。」
場地提供︰Town
|
鍾意就快D Share啦！
|
|
|
