這是一個步向死亡，但卻充滿希望的故事。
故事女主角是譚彩鳳，今年56歲，患上末期乳癌。如果說人生是一場戲，她所主演的一定是場悲劇。
重度抑鬱症的二十年
36歲那年的彩鳳，突然遭受了三重打撃：媽媽被確診為末期肺癌，不夠一個月就離世；之後又發現爸爸同樣患上末期肺癌，幾個月後也離世了；同一時間，知道了結婚十多年的丈夫出軌：「我相信如果丈夫出軌，對女人嚟講，一生嘅烙印係唔會忘記。」
短時間內人生完全垮掉，彩鳳曾企圖衝出馬路自殺，幸好被妹妹阻止。精神科醫生確診她患上嚴重的抑鬱症，令本身是社工的彩鳳很難接受，「能醫不自醫」的痛苦令她過了一段時間便私下停藥。
童年曾被性侵
雖然從自殺邊緣被拉回來，但命運似乎並沒有放過彩鳳，離婚後和前夫購置的物業變成負資產，最後她被迫破產，換來的是抑鬱症發作，醫生更發現她患上「驚恐症」。
「去到地鐵站，嗰種好多人嘅感覺，令我好窒息，我呼吸唔到，覺得好辛苦，好想快啲逃離現場。」彩鳳憶述時仍略帶激動。在治療過程中，彩鳳發現自己驚恐的源頭，是年約三歲時被親友性侵的經歷，「咁細你唔會識去表達，但係嗰種驚恐就潛伏喺我心裏面，原來係一世咁不斷影響我。」
而作為家中大姐姐的她，因為父母是聾啞人士，她從小便要當起「代言人」角色，要與陌生人及成年人打交道，就算內心很害怕亦要去做，更漸漸變成了習慣：「變成如果老闆叫我做嘢，我唔識拒絕，我永遠係接、接、接，可能已經係超負荷自己都唔知。」
患上末期乳癌
長時間的超負荷，加上三次的抑鬱症發作，當心靈最需要扶持的時候，癌魔卻找上門來，彩鳳發現自己患上末期乳癌，現時癌細胞已經入骨：「一開始嘅時候，一樣都係會驚、會好唔開心，但係回過神來、鎮定之後，我就覺得應該要好好咁去打呢場硬仗！」
或許，當人生去到每日都在倒數的時候，心境會變得不一樣：「好神奇嘅係，當癌病出嚟嘅時候，反而好短時間，就將我嘅抑鬱情緒病覆蓋咗。」
生日會暨「纓紅宴」
這兩年來的抗癌路，每月兩萬元的醫藥費，彩鳳已負擔不起租樓，而兩個妹妹已各有家庭，幸好身邊仍有很多好友，願意為她提供容身之所：「我2011年就申請單人公屋，依家仲輪候中，我可能死咗都未輪到我上樓。」
彩鳳很明白，愛要及時，相見亦要及時。她相信能趕及離世前再見至愛已算無憾，所以趁自己還有精神，打扮得漂漂亮亮和家人影「全家福」。又在9月生日時，將生日會當成「纓紅宴」：「我自己知道生命嘅狀態，所以我珍惜每一次可以相聚同見面嘅時間。我覺得我在生時你願意嚟見我，比我離世之後，你嚟參加我嘅喪禮，對我嚟講係更加富有意義。」
音樂會般的喪禮
她更已經為自己的喪禮作好準備：「我瞓喺棺材嘅時候，都要做一個靚靚公主，好靚嘅，唔需要愁容滿面，我要搵一個最好嘅化妝師，幫我化一個最靚嘅妝！」能夠豁達笑對死亡，一切都是來自愛：「我要為自己安排身後事，我覺得係對自己一個好負責任嘅態度，亦都係對我屋企人一個愛嘅表現。」
彩鳳很喜歡音樂，所以選定《星球大戰》作為瞻仰遺容時播放的歌曲，「幾有氣勢呀...音樂係我鍾意嘅嘢，當我喺另一個國度，你哋就喺地上一齊參加一場音樂會，我覺得會係我人生裏面，一個最佳、完美嘅句號。」
出書圓夢 延續義工夢
彩鳳說，原本一年前就應該已經離開，但由於她參與了醫院的「白老鼠」計劃，正在試一些治療乳癌的新藥，能活到今天，她說每一天都是「賺緊」的。她深深明白到生命有限，唯書本不朽，出版自傳成為她其中一個「遺願」。「我想寫出自己五十六年人生嘅高與低、苦與樂，點樣去克服種種困難，希望帶畀社會一啲正能量，亦畀屋企人、朋友留作紀念。」
在各方好友協助下，1500本彩鳳自資出版的自傳，在今年書展面世，因為彩鳳一直以來都有到世界各地做義工，現在未能再身體力行去幫助有需要的人，亦希望透過捐出全部版稅予「聯合國難民處」，盡綿力幫助苦難中的兒童和婦女。
這本自傳的書名簡單直接，叫《活得精彩》，封面的語錄是：「欣賞不完美當中的完美，放過自己、善待自己，活在當下，珍惜一切，凡事感恩。」彩鳳形容：「能完成呢本書，我覺得我嘅人生已經超額完成，死而無憾啦。」
「死而無憾」四個字，解釋容易，領會困難。今集《港。故》用9分鐘，記錄了彩鳳樂觀面對人生最後一里路的故事。
-------------
《港。故》：東網每周專題習作，講故事、講香港人的故事，請關注《港。故》FB：http://bit.ly/oncckonggu_FB
Follow埋《港。故》IG，睇更多精彩靚相：http://bit.ly/oncckonggu_IG
|
鍾意就快D Share啦！
|
|
|
