《延禧》全劇70集，昨日（10月6日）終於喺TVB播晒，唔少觀眾睇完大結局後都覺得好空虛，話之後唔知仲有無咁好嘅劇可以追。都啱，畢竟《延禧》劇情節奏快、高潮迭起，而且一啲細節位更令人深刻難忘，就好似瓔珞、傅恆嘅生離死別，唔需要當事人面對面喊苦喊忽呢啲常見橋段，反而透過第三者海蘭察交代傅恆之死，並轉達遺言，反而能夠突出世事無常、人生無奈，因為相愛不單唔可以一齊，就連死都無得見最後一面，但對方嘅死偏偏係因為愛你，夠晒錐心刻骨，足以令觀眾淚崩。
因為劇情好、角色好，所以觀眾自然好難發現一啲瑣碎嘅畫面背景，穿崩位更加難以察覺。但其實，好劇如《延禧》都會有「失手」嘅時候，且多涉及現代物品，有人甚至講笑話《延禧》係部穿越劇。就容《壹》仔喺《延禧》完結後，為大家列出幾個較易令人忽略嘅穿崩位：
１） 第9集，繼皇后當時仲係嫻妃（佘詩曼飾），而佢細佬為咗升官竟然行賄，事敗後被捕入獄。嫻妃謹守老竇教誨，唔願向皇上求情，但阿媽唔體諒更怪佢見死不救。此事令嫻妃心事重重，於是寫家書希望阿媽明白守法重要性。嫻妃越寫越心煩，將寫緊嘅家書丟落地。呢個時候，純妃來訪，執起地上嘅家書打開嚟睇。咦！內容同字跡，由嫻妃寫到純妃睇，都係兩回事嚟喎，封家書唔接戲喎。
２） 第12集，先皇后（秦嵐飾）舉辦嘅荔枝宴上，狗仔雪球被冤枉毀掉荔枝樹，瓔珞順勢燒埋狗主高貴妃、嘉嬪嗰疊。嘉嬪跪地向先皇后道歉求恕罪。呢個時候，先皇后身後出現咗大家平時喺大排檔食飯常見嘅嘢──膠凳。
３） 第14集，怡親王為討高貴妃歡心，誣陷瓔珞勾引侍衛慶錫，件事鬧到去皇上（聶遠飾）面前。一經審問，怡親王奸計敗露，皇上龍顏大怒，狠狠猛踢怡親王。聶遠太入戲踢得太狼死，就連收埋喺戲服中嘅話筒擴音器都跌埋出嚟，映入鏡頭。
４） 第20集，皇上生日設壽宴，高貴妃安排西洋管弦樂隊表演，令皇上開心到不得了。管弦樂當然唔少得色士風啦，不過色士風1840年先被比利時人發明喎，而乾隆旦於1711年，1799年駕崩，在世期間係唔會有士色風嘅存在。其實，《延禧》係部穿越劇嚟架。
除咗上述穿崩位，其實仲有純妃遞手但無宮女攙扶、錦繡被瓔珞潑水一身濕但轉眼即乾、乾隆龍袍條龍無霸氣似Q版公仔等穿崩位，難以盡錄。
立即下載Apps，隨時隨地睇盡時政專題、深度偵查、娛樂熱話！按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
