（互聯網）
曼聯今個夏天一直物色中堅加盟，可惜最終未能成事，領隊莫連奴亦一直埋怨中堅力量薄弱，不過佢哋好大機會喺1月買人，近期多次同曼聯扯上關係嘅瑞典國家隊隊長格蘭基斯，日前證實收到「紅魔鬼」斟介，仲話1月會仆到去加盟添！
格蘭基斯接受瑞典《快報》訪問話：「曼聯的確有表示過興趣，我好榮幸可以得到咁大間球會垂青，如果曼聯1月嗰陣正式開價，我同球會都一定會答應。」33歲嘅格蘭基斯，於俄羅斯世界盃以隊長身份帶隊出戰，於後防一夫當關，應付高空波非常稱職，仲係球隊12碼劊子手，分別射破南韓同墨西哥大門，係球隊殺入八強嘅一大功臣。
不過佢已經33歲，依家只踢緊瑞典次級聯賽球會希爾星堡，喺07年雖曾被借到英超韋根，並於07至08年度正式加盟，但未能企穩陣腳，翌年就借番畀希爾星堡。及後佢曾轉會荷甲格羅寧根同意甲熱拿亞，不過都唔見得特別出色。格蘭基斯成個職業生涯，但未做過主角，呢次有機會加盟曼聯，絕對係夢想成真。
曼聯如果真係出手買人，相信都唔會當格蘭基斯係主力，但紅魔鬼貴為全球最賺錢，而且又係其中一間最知名富豪球會，「淪落」到要吼格蘭基斯，相信係球會高層唔想再為領隊莫連奴斥巨資買人，另外寸王嘅方丈性格，同陣中球星不斷反面，球星睇見都怕怕，未必會揀曼聯落腳。莫連奴麾下嘅紅魔鬼，究竟剩番幾多號召力呢？
東網體育FB同你追實體壇每個精彩時刻！
http://bit.ly/2ecTF2A
來源 source: http://hk.on.cc
|
鍾意就快D Share啦！
|
|
|
