嘉穎臍帶當何B仔：咁大條嘅！
鄭嘉穎一擊即中，趕及明年「入五」前做爸爸！前晚他與太太陳凱琳（Grace）分別在社交網公布有喜的消息，雖然他被爆陪Grace照超聲波時，以為臍帶是「何B仔」，不過Grace有「龍鳳胎」真傳，二人當然希望一索得「好」
49歲藝人鄭嘉穎與27歲陳凱琳今年八月在峇里島舉行婚禮，前晚嘉穎出席電影《P風暴》煞科宴後，於晚上10時許在社交網上載與Grace的擁抱照，留言宣布快將為人父母的喜訊。先是嘉穎在ig留言：「感恩節，一個為了慶祝和感激我們所擁有的節日。在這個特別的日子裏，我和太太想分享一份大禮物，就是我們家庭將會有一個小寶貝！雖然在成為父母的道路上仍然有很多東西要學習，但我們承諾，會盡最大的努力去照顧我們家庭的最新成員！」之後Grace也以英文發表同樣的留言，嘉穎更冧爆晒愛：「辛苦你啦老婆！」不少圈中朋友紛紛送祝福。
「入五」前做老竇
二人婚後甚少露面，養尊處優，Grace除了接活動外，連無綫台慶都沒有出席，而本月中出席活動時就包到冚示人。據知，二人一直有努力「造人」，因為嘉穎恨B恨到不得了，鄭媽媽亦望抱孫，Grace咁後生，估唔到兩人一擊即中，嘉穎趕得切「入五」前做老竇，絕對是開心事！
其實兩人早前已知道喜訊，Grace每每完成工作即急急腳返回位於北角的千萬「新居」，穩陣為上。不過，據其身邊人表示，Grace身形纖瘦仍未見肚，但已經大胃王上身般，周不時想吃甜食，又不時與好友出外吃東西，烤肉、蛋糕統統不放過。而嘉穎得知快將為人父後，開心到忍不住口跟身邊好友公布喜訊。由於Grace本身是「龍鳳胎」，有一名弟弟，所以嘉穎好希望Grace得到真傳，一索得個「好」字就最圓滿！記者聯絡Grace，她以短訊簡單回覆：「好開心，其他嘢就唔講喇！」下周二，她將會跟人母陳慧琳齊齊出席紐約時尚品牌Carolina Herrera新香水Good Girl發布會，屆時定必跟大家分享喜悅。
黃智賢踢爆瘀事
大批記者昨日在Grace父母位於九龍塘的獨立屋守候，約十二時許，陳爸爸陳桂祥與太太打開住所大閘準備外出，陳媽媽見到記者表現怕醜，即時上車，而陳爸爸禮貌受訪，記者上前恭喜，他連聲多謝。對於有傳Grace奉子成婚，問到Grace懷孕幾多個月？他避談說：「問番佢」至於是男嬰還是女嬰？他不願透露：「仔女都冇所謂。（阿女佗B有冇唔舒服？）我都唔係好清楚。（有冇煲湯水畀佢補吓？）呢啲交畀佢媽咪。」
另外，身為嘉穎「老死」的黃智賢昨日出席台慶活動時坦言一早知喜訊，更大爆嘉穎瘀事：「之前我哋去嘉穎屋企食飯，佢哋好開心，話有個好消息話畀我哋知……嘉穎陪Grace照超聲波，一望到個螢幕時佢話：『嘩！咁大條嘅！』醫生話佢知，呢條係臍帶嚟o架喎！佢當晚同我哋講時，我哋笑咗好耐，我識佢咁耐，都知佢好想做Daddy，我就第一次做契爺。（想收契仔定契女？）仔定女就等佢哋自己講我做契爺就好開心，見到佢哋恩恩愛愛又開心。」
|
鍾意就快D Share啦！
|
|
|
