袁偉豪黃智雯擸盡星馬視帝后
昨晚無綫台慶夜宣布馬來西亞及新加坡視帝視后賽果，結果由袁偉豪及黃智雯贏盡兩獎，揮低其他勁敵包括陳展鵬、馬國明、胡定欣及陳煒等，齊齊成為雙料視帝視后！
無綫節目《萬千星輝賀台慶》昨晚在將軍澳電視城舉行，全台動員慶祝公司51周年，今年除有表演及抽獎環節外，還頒發新加坡及馬來西亞視帝視后，相當有可觀性！
早前TVB宣布取消分別在兩地舉行的《星和無綫電視大獎》及《TVB馬來西亞星光薈萃頒獎典禮》，改於台慶夜頒發，「馬來西亞最喜愛男主角」三強是陳展鵬、王浩信及袁偉豪，最終袁偉豪贏出！2007年贏得港男冠軍的他憑《棟仁的時光》得獎，劇中他角色要不停錫人換取時間，超有發揮機會！
女友張寶兒讚叻
馬國視后三強是胡定欣、李佳芯及黃智雯，結果由黃智雯喊住攞獎！她首先多謝第一套劇的拍檔汪明荃：「我當時做得好差，但佢頭先話我進步好大！」還多謝TVB及一眾姊妹。2007年選港姐入行的她在劇集《三個女人一個「因」》中演繹三種人格，性格鮮明演技大爆發，在星馬更有大批Fans支持。她在台慶夜更孭飛一Part，率領數十位身穿校服的年輕藝員起舞，戴上黑超在煙火包圍下出場，霸氣十足！
其後，袁偉豪及黃智雯再下一城，贏埋「新加坡最喜愛男女主角」，可謂威到盡！袁偉豪早前專程到新加坡拉票，果然有效，他坦言這份喜悅太開心：「我會好好記住呢一晚！入行20年今年好豐收，好多經歷！我會繼續努力，演到我生命耗盡一刻。」女友張寶兒被追問感受，她大笑說：「你真係好叻呀！」黃智雯則撼贏胡定欣及李佳芯，直言感覺幸福，並感激監製潘嘉德：「努力未必有回報，但只有肯努力，一定有人睇到。」馬國明雖備受睇好下而失獎，但他得知賽果後依然大方有笑容。
胡定欣撐好姊妹
失獎的陳煒身穿低胸紅色晚裝，由頭到腳大玩透視，笑言沒有特別Keep Fit：「可能何國鉦（設計師）慳布料頒獎禮件晚裝，我覺得好似泳衣！（到時夠膽着？）冇話夠唔夠膽，最緊要靚！」講到獎項，她直言平常心，又指明日生日但太忙，尚未有慶生約會。至於胡定欣以透視仙氣造型配400萬首飾亮相，走路時見股邊，相當「股惑」，她笑說：「打扮女仔啲都好吖，可以試多啲唔同嘅嘢。（扮女仔定型格吸引？）私下都有女仔一面，甜美係應該。（咁有拖拍未？）未呀！點算呀？都係專心工作先」最近未開新劇的她稱有時間思考人生，望明年事業愛情兩得意，又指沒有信心贏，支持好姊妹黃智雯及陳煒。
趣劇環節中，一眾小生花旦在「法庭」被審問，黃翠如被問到TVB對她最好是甚麼？她大方說：「拍劇拍到搵到條佬！」男友蕭正楠在後方即冧笑。其後，司儀鄭裕玲要求馬國明與女友黃心穎咀嘴，但兩人不肯，「蝦頭」楊詩敏遂向他逼吻，袁偉豪衝出來扮咀蝦頭解圍。另外，51萬存款戶口大獎由藝員黃庭鋒奪得。
|
鍾意就快D Share啦！
|
|
|
