真嘢攞出嚟講？
喺台慶艷壓全場嘅馮盈盈，尋晚同蘇麗珊及JW（王灝兒）再上《美女廚房》誓要一雪前恥，最終盈盈大比數勝出一洗「地獄廚神」污名！不過身為香港小姐嘅佢有嚴重口音，好似「鄉」港小姐、好「缸」淨、床前明月「乾」…真係「字字珠機」，當然點會逃得過戲劇大師詹瑞文（詹Sir）對耳，搞到詹Sir要不斷出口糾正！
雖然有口音，不過盈盈口齒伶俐，輕輕鬆鬆就讀到「黐線蜘蛛啲蜘蛛絲黐住支樹枝」，囂張到佢都讚自己：「我條脷好叻㗎！」唔只條脷犀利，盈盈轉數都好快，佢見到支紅酒時懶叻拋書包：「我覺得似係Old world…『Bordeaux』嗰邊囉！」見識廣闊嘅詹Sir一聽就知佢讀錯，寸番盈盈：「咩係『Bordeaux』（波爾多）呀？」反應勁快嘅盈盈不惜「自爆」塊臉打咗肉毒桿菌（Botox）：「啱啱打完Botox返嚟呢，啲牙骹好緊呀！」搞到全場大笑，就連要求高嘅詹Sir都拍爛手掌！
而盈盈事前就喺Instagram大晒文采：「我高傲 但係宅心仁厚 我低調 但係受萬民敬仰 我可以將神賜比人類嘅火運用得出神入化 可以煮出堪稱火之藝術嘅超級菜式 我究竟係神仙嘅化身？定係地獄嚟嘅使者？」而最後佢以93分「破地獄」成功變身美女廚神，網民都話唔明佢上次點解會係地獄廚神，有排都未輪到佢咁話！
來源 source: http://hk.on.cc
|
鍾意就快D Share啦！
|
|
|