58歲戲骨戴志偉，擅演奸角、反派、負心漢。識佢嘅人都知佢有少少火爆，特別係鬧TVB嘅時候。不過，對住老婆佢永遠都係陰聲細氣勁溫柔。記得戴志偉講過：「依家生活好優哉悠哉，得閒踢下波，再同老婆拍下拖。」《壹》仔又真係不時見到佢同老婆四圍逛架。佢兩公婆雖然手仔都唔會拖下，但絕對唔會無話題，睇落cool到爆嘅老婆，有時都會被戴志偉嘅說話打動，忍唔住戚一戚嘴角偷笑。
對住老婆，戴志偉係一副甜心先生嘴臉。不過講起服務咗30年嘅TVB，佢就火都嚟！
「TVB係對藝人極之唔尊重！人工更加唔使講啦，佢直情希望你唔好收佢錢，然後貼埋錢俾佢，佢就俾個平台你，佢真係成日以為咁樣囉。」戴志偉亦曾經講：「成日諗辦法壓榨我哋，點減你人工呀，點計你啲騷呀，咁冇意思有次仲同我講：『你今年唔夠騷，你免費做3個月啦，呢3個月公司會幫你谷爆騷佢，咁就可以出返啲爆騷錢俾你。』即係遲3個月出糧啦，我掉轉頭問番佢3個月唔出糧得唔得？佢苦笑囉。」
好彩戴志偉醒目，覺得幫大台打工無保障，所以十幾年前已經開始做保險，而家已經係高級經理。除咗收入好好多，亦無咁辛苦。以前點辛苦法？佢話試過7日7夜無得瞓，仲要三十幾度喺搵一條草嚟遮蔭都無嘅石礦場拍打戲，當時連琴姐（李香琴）都唔肯埋位，仲話：「攞人命咩！」真係攞人命架，事關戴志偉仲話當時有個臨記阿頭中暑不省人事，好彩送院後執返條命。
藝員搵命搏仲要倒貼又不被尊重，希望TVB已經改善呢種情況啦。
來源 source: http://nextplus.nextmedia.com
|
鍾意就快D Share啦！
|
|
|
