熱爆娛樂: 【狗仔出更】陳展鵬傍實大肚單文柔濕平愛妻號拎戰利品 _

2018年12月26日星期三

【狗仔出更】陳展鵬傍實大肚單文柔濕平愛妻號拎戰利品 __,單文柔,陳展鵬,

陳展鵬今年10月迎娶16年落選港姐單文柔，佢哋新婚僅一個月就報喜，出年做豬爸媽，單文柔已懷有「小豬比」，展鵬事後見記者時話估計老婆有咗3個月（新聞連結： https://bit.ly/2Bg2C5v ），計番日子，佢哋係奉子成婚。

展鵬係愛妻號，老婆有咗好緊張，出街都要傍到實，佢哋日前去咗中環行商場，拍拖濕平，展鵬負責拎住啲戰利品，等陀B有4個月嘅老婆可以輕輕鬆鬆享受購物樂。不過展鵬因為戴咗口罩，難免被人望多兩眼而認出。佢哋行到攰攰哋，單文柔唔知係咪口渴，佢行先入咗間咖啡店買嘢飲，跟住兩公婆就去咗商場嘅客戶服務中心，估計係搞免費泊車優惠，單文柔周圍望，眼利發現有記者偷拍，佢立即同老公單一聲，佢哋隨即收起笑容變嚴肅，然後箭步走去搭電梯落停車場。唔知展鵬係咪同老婆拍拖買BB嘢，佢當日回覆傳媒時話：「多謝關心，咁啱經過，買自己年尾做嘢啲衫咋。」

唔單止係單文柔陪老公買衫，有時展鵬都會陪老婆行街買嘢。好似之後幾日，《蘋果》又撞見佢兩公婆出動，今次輪到展鵬陪老婆買衫，佢哋下午3點半喺中環一個商場嘅時裝店睇便服，展鵬全程企側邊陪老婆睇女裝，企足20分鐘，之後就同老婆排隊畀錢。展鵬見到記者影相都有笑一笑，而離開舖頭時，展鵬小心呵護住大肚老婆，跟住兩個人去停車場攞車走。

精選娛聞，喺晒《娛果》

http://fb.com/appledailyent

攝影：黃曉程、朱志聰、孔志豪	陳展鵬戴住口罩出動。	 陳展鵬陪大肚單文柔去中環行街。
 陳展鵬陪老婆恩愛出巡。	 過咗幾日，兩公婆就趁假期去買便服。	 陪老婆行街眼瞓到打呵欠？早啲返去休息下啦。
 離開舖頭時，展鵬小心呵護住大肚老婆。	 跟住兩個人去停車場攞車走。