為咗呢篇專欄， 我都算嘔心瀝血， 試云全港高級「竇」嘅蛇 羹，包括半島嘉麟樓，軟庫飯堂咁啦。 聽啲食肆揸拂人講， 祖國唔夠蛇，要由泰國入口急凍蛇肉， 唔喺呀嘛，好多公司 都大把「死蛇爛鱔」，冇蛇！
講多無謂，一落飛機第一餐就 要去家全七福打咭，試吓全港 最貴嘅蛇羹 ，一碗賣 ＄900，計埋加一，成千銀一碗㗎！ 嘩 ，果然有料到， 佢哋連啲蛇骨都唔好嘥，隊埋落去餚湯底， 不過我只係敢食一羹咋， 剩低嗰啲俾個寒底老友補補身，事關食一羮已成身暖晒， 免得飽暖思淫慾。嘻嘻！
我同七福嘅大家姐阿文講， 試過佢哋對家 「國福樓」 嘅蛇 羹， 都要八嚿水 一碗呀， 招積得佢話 : 「咁平嘅！」年年請客食蛇羹嘅恒生銀行，有個經理同我講， 由11月中到農曆年 ，晏晝同埋夜晚餐餐陪客去恒生頂樓食蛇羹 ，真係食到流鼻血呀！ 所以見佢嗰時，佢唔食蛇羮，飲碗例湯咋！真係櫈佢可憐！
【蛇羮各有千秋，唔服嘅話就自己去試】
軟庫飯堂 :「切絲有刀功 ，叫價貴過舊舖; 無計，名人排隊嚟新架步試，唔憂做！」
老巴刹: 「其藥膳蛇羮，比較冷門，食完補上加補。 」
半島嘉麟樓 :「自從沙士過後，鬼佬管理嘅酒店都冇蛇羮食，半島為咗箍住啲食饕，原訂十二月推出，我就率先俾錢試食， 建議要加返啲色水， 顏色清咗啲。」
恆生銀行頂樓:「大眾化咗啲。 」
家全七福: 「有料到，一食就知用蛇骨淆湯。」
温馨提示: 啲平價蛇羹，猛落白胡椒，搞到成口㷫，咪以為好嘢！
來源 source: http://nextplus.nextmedia.com
|
鍾意就快D Share啦！
|
|
|
