【娛樂人物】毛舜筠入行40多年，人生步向黃昏越豐收，今年憑着《黃金花》初嘗影后滋味，感情路上雖經過多番挫折，要到第三段婚姻才找到「對的人」，與現任丈夫區丁平結婚24年，為對方鑽研廚藝，甚至飛去法國藍帶學烹飪，以靚餸佳餚維繫幸福姻緣。不過，提起傳聞中，舊愛張國榮是她與區丁平的媒人，毛姐直到今時今日才澄清，僅是一場美麗的誤會。
採訪：余燕儀
攝影：沈健程
相關新聞：拒絕張國榮求婚
現年59歲的毛舜筠明年就「登六」，她的生命卻越活越精采，入行40多年的她，今年憑電影《黃金花》奪得金像獎最佳女主角，首嘗影后滋味。兩年前她往法國進修藍帶廚藝文憑課程，去年正式成為藍帶廚師，上星期更榮升老闆娘在灣仔開設曲奇餅店，這間餅店是她和老公區丁平（Tony）的心血結晶。
毛姐的感情經歷過滄海桑田，區丁平是她第三任老公，但最人所共知的，是她17歲時跟張國榮（哥哥）有過一段puppy love，後來毛姐在21歲嫁給首任老公文舒揚，婚姻僅維持3年；29歲與第二任老公蔣家駿結婚，5年後離婚；到35歲跟區丁平閃婚，婚後二人育有兩女，婚姻踏入第24年。
| | |
識咗幾十年
一直有傳當年是哥哥做媒人，介紹區丁平給毛姐認識，毛姐日前在灣仔接受《蘋果》專訪，她又好氣又好笑地澄清：「梗係唔係啦，呢個謠傳傳咗幾十年，我真係好嬲，不過我懶得去澄清，嚴格嚟講，穿紅線嘅人係梁太（梁李少霞），但佢又唔係介紹人，因為我哋識咗好耐，大班朋友成日去梁太屋企聚會，我哋根本唔需要人介紹，已經識咗幾十年，只不過係梁太見到我哋都single，曾經約我哋食飯，就係咁之嘛，食吓食吓就開始拍拖，同哥哥完全冇關，哥哥只不過喺我結婚時出現，同埋佢知我同Tony拍拖時，佢話：『正喎！』就係咁啫。」
愛情可以改變一個女人，不懂下廚的毛姐，為了丈夫甘心做「煮」婦，她笑言：「以前成日都拍戲，人哋問我識唔識煮嘢，因為我唔識，但話畀人聽唔識好似好低威，所以我話：『我做大事㗎，哈哈！』但同Tony結婚後，佢唔鍾意出街食飯，但我唔識煮，問老友梁李少霞，佢每日教我一個餸，我自己一日煮兩個餸，一路加落去，到𠵱家入廚24年，如果唔使開工，每餐都係我煮。」
相關新聞：獎項緣薄演技有笑有淚
滿足過演戲
區丁平與毛姐感情已達細水長流：「𠵱家昇華到唔同level，好似兩嚿好多稜角嘅石，經過24年磨合，完全了解同適應，好似睡衣同拖鞋咁，好舒服，好知道佢性格係點，如果明知道會辣着就唔講，佢最鍾意食，所以成日都整嘢畀佢食。」因做「煮飯婆」令她愛上烹飪，更發掘了與做戲相似的滿足感，她表示：「不斷聽到有人話我知：『《家有囍事》睇咗幾十次，好鍾意，連對白都完全識背。』我好開心，煮餸一樣，當你見到食嘅人鍾意，某程度上滿足感仲大過做戲，因為做戲只係扮演一個角色，有其他人分工合作，但煮餸由買料到煮，所有嘢全部都係我一個人做。見到鍾意嘅人、屋企人、朋友食得開心，好enjoy！」
場地提供：Mustard Seed Co-working space
|
鍾意就快D Share啦！
|
|
|