熱爆娛樂: 【咁你又賣？】黃牛全額退華仔炒價飛狠罵行家：為咗錢冇做人道德底線 _

2018年12月31日星期一

【咁你又賣？】黃牛全額退華仔炒價飛狠罵行家：為咗錢冇做人道德底線 __,劉德華,華仔,

劉德華因為確診流感，噚晚宣佈再取消多4場演唱會，前後共有7場騷取消咗。大會亦已經發聲明，呼籲持有呢幾場騷有效門票嘅觀眾，要保留門票，等待主辦機構宣佈後續安排事宜。

喺28日華仔首日腰斬演唱會之後，已經有網民呻苦，話以$6,000買咗$980飛，又搵唔到個黃牛賣家。消委會總幹事黃鳳嫺早前亦表示，大會退票時對消費者的保障只限於門票的原價，故黃牛飛對消費者的保障「非常之低」。（新聞連結： http://bit.ly/2BOJonP ）

正當呢啲黃牛買家擔心緊嘅時候，有自稱係黃牛賣家喺facebook群組到出post，話自己退番全數金額畀佢嘅買家。呢位黃牛賣家甚至舉例，有行家以$12,500賣咗兩張$980飛，佢話知道買家係辛辛苦苦搵錢，勸行家「拎番個良心出嚟」、「唔夠你致富發達」、「將心比己」、「為咗錢冇咗做人嘅道德底線」，佢又公開行家個人資料，叫佢哋考慮下消費者嘅感受。

相關新聞：【確診流感】劉德華宣佈取消餘下4場紅館個唱全面休息

雖然呢位黃牛賣家「充滿良心」，不過留言嘅人就唔係咁睇，先係指出買賣黃牛本身已經唔啱，退飛只係五十步笑百步，又有人話呢位黃牛賣家識推廣，做個良好形象出嚟引人下次再幫襯，甚至收咗啲飛返嚟，就可以等大會安排退錢，完全唔會蝕。

精選娛聞，喺晒《娛果》

http://fb.com/appledailyent

劉德華噚晚宣佈取消4場演唱會，前後總共7場。	 有黃牛賣家話全額退飛。（facebook圖片）	 佢仲舉例，有啲行家收咗錢就玩失蹤，好冇良心。（facebook圖片）
 大義凜然…（facebook圖片）	 但留言就唔領情，更指出佢只係五十步笑百步。（facebook圖片）	 （facebook圖片）