現年31歲嘅倪晨曦同圈外男友「V先生」拍拖兩年，感情穩定，今日係2018年最後一日，倪晨曦宣佈已訂婚，剛才佢喺Ig貼出男友喺巴黎跪地求婚片，原來男友早前已向佢求婚，佢留言：「我想了很久很久這件事是人生中那麼重要的時刻，也是今年讓我感觸最深的一件事，想要分享給你們，那就是我訂婚了！」
件事係發生喺倪晨曦今年九月尾至十月初去巴黎出席時裝周活動，喺工作完成後，髮型師Green指自己錢包唔見咗，倪晨曦抱住相機即衝返拍攝現場，突然男友「V先生」出現喺橋上，倪晨曦形容：「當時真的大腦一片空白，完全傻掉，有閃過一下在想難道他穿越了，明明早上還在WhatsApp上和在香港的他說晚安，為甚麼會在這個瞬間出現，他說了好多好多，但我都不記得了，只是一個勁的哭，因為我好感動，沒有想過他會選擇在我覺得最浪漫的城市向我求婚。」
倪晨曦指同男友一齊嗰陣，佢哋都好少討論結婚嘅事，因為男友知倪晨曦事業心重，「他總是默默的在我身邊不斷的付出，給我一個溫暖的避風港，這個全世界對我最好的男人，永遠都把我放在他前面，包容我、照顧我，對自己總是超級節省，但把最好的都留給我，上輩子一定是做了甚麼好事，這輩子有這樣的疼愛，原來安定下來的心感覺是那麼的踏實」，佢更搞笑將男友求婚驚喜稱為「獵豬行動成功」。
倪晨曦回覆《蘋果》講到訂婚喜訊，心情依然激動，佢話：「揀今日其實我寫緊今年紀錄，自己做咗啲乜嘢，寫吓寫吓，睇番今年發生咗嘅相同片，自己再睇一次條片，其實我都再次感動到，我覺得發生咗一件咁開心嘅事，無論我嘅工作做多幾多嘢都好，其他方面幾大成就都好，一件人生大事，影響咗我好多嘢，2018年發生，我冇同大家講過，所以就喺12月31號呢一日，話畀大家聽，所以我考慮咗一日之後，就決定咗喺今日post喇！」
問到幾時舉行婚禮?佢話：「我自己好開心，我都希望身邊朋友fans繼續支持我，Wedding plan喺2019年，多謝大家關心。但詳情未決定到。」
倪晨曦仲話男友係喺巴黎求婚，當時自己身在當地工作：「佢做呢件事，好感動、震驚，完全冇諗過會喺嗰個時間，因為嗰時做緊嘢，佢出現係大驚喜，所以完全控制唔到自己情緒。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
