黃子恆不愧為食家，多年來當正大台係後花園，不停採摘可供食用嘅靚女，花旦類有吳若希、李佳芯、朱晨麗，主播類有羅鈺文、張文采。曝光嘅為數唔少，未曝光嘅肯肯定大有人在。
搵食，梗係去Canteen啦，有次黃子恆喺大台員工餐廳，𥄫中未嫁嘅主播羅鈺文，三唔識七照埋身抄牌。之後用同樣手法媾張文采，當時仲係張文采男友嘅羅鈞滿即時鬧爆佢冇品，見女就追。
2014年，黃子恆同李佳芯合作《Sunday扮嘢王》，隨即嗒糖力追。盛傳二人有過半年情，而Ali成日四圍問同事「黃子恆係個點樣嘅人」，明顯對個男人冇信心。另外，二人被影過喺西貢撐枱腳，事後被同事問到，個女仔冇否認，反而個男嘅唔想講，搞到最後半年就散咗！
到2015年黃子恆同吳若希合作《實習天使》又傳出緋聞。女方被影到做埋柴可夫接黃子恆收工，再孖住喺赤柱撐枱腳。不過最後見光死，未有下文。
之後輪到「叱吒一時」嘅偷食人妻裕美事件。據聞女方經常到黃子恆西貢寓所密會，更斷正拍拖行街買餸，之後又有情慾短訊流出。一直龜縮嘅黃子恆最終蒲頭，公開承認同裕美關係，仲好man咁揚言：「我好想保護佢，支持佢。」
黃子恆講嘅時候信誓旦旦，但短短半個月已經轉口風，話同裕美冇聯絡，更火速約喺《味想天開》做一對嘅朱晨麗去酒店飲酒傾心事。被《壹》仔撞破後，朱晨麗大方回應，不過黃子恆即時黑面、迴避鏡頭，甚至唔肯同朱晨麗一齊入𨋢。反而朱晨麗臨走前，不忘向黃子恆講：「係啦，你自己走！」
來源 source: http://nextplus.nextmedia.com
|
鍾意就快D Share啦！
|
|
|
