杜琪峯代表林嶺東追思委員會接受傳媒訪問，他表示委員會中尚有徐克、張艾嘉、岑建勳、林嶺東太太，他說：「好多謝大家關心，阿東其實係一個好熱愛電影嘅工作者，平時生活簡單同低調，佢嘅葬禮上，我哋都跟番佢屋企人嘅安排，盡量簡單，平靜舉行。其實今日追思會係畀大家記憶番阿東，同阿東過往開心嘅日子，所以林太亦都攞咗阿東生前嘅酒嚟同大家分享，藉住今日嘅追思會，亦都希望大家能夠友誼長存。阿東嘅離開令到大家更加團結，同埋多啲關懷，希望大家珍惜現有、活在當下，生活都總要過。」
問到在追思會上有沒有甚麼分享？杜琪峯透露：「大家都係傾吓啲開心嘢、歡樂事，唔再悲傷，因為日子都要過，阿東都唔想見到我哋歪埋口面，佢係一個非常之開朗嘅人嚟。」
提到張家輝透露林嶺東有一套未完成嘅遺作，杜琪峯說：「其實我都唔清楚，要問番張家輝，而林嶺東生前嘅《八部半》其實已經完成咗，如果大家要追悼佢，就可以睇呢部作品。」
問到杜琪峯心情如何？他說：「其實都冇得好番嘅，呢個係我40幾年嘅朋友，我哋由73年相識到現在，有好多接觸，無論佢喺邊度返嚟都會搵我食飯，45年嚟都冇試過失聯，亦都冇拗撬，佢嘅離開更加令我覺得所有嘢冇我想像中咁簡單，嚟得快就去得快。」
|
鍾意就快D Share啦！
|
|
|
