【新增內容】長和（001）資深顧問李嘉誠出席長實周年晚宴前見傳媒，表示世界經濟複雜，今年「經濟差一啲、樓價波動厲害啲」，用GDP（國民生產總值）看，幾乎個個國家都面對低增長，重申「樓市波動要量力而為，自住、分期得嘅話，就冇問題，千萬唔好炒。」
李嘉誠又重申，其對於長和及長實（1113）一直是「有買冇賣」，最近更加增持長實，「舊年用咗唔少錢買。」至於有記者問到關於長建（1038）配售電能（006），李嘉誠指要問Victor（李澤鉅）。
恒生銀行首席經濟師薛俊昇同意李嘉誠預測，預計今年環球經濟增長將較去年放緩，皆因主要經濟體前景未明，美國減稅效應消退、中美貿易談判結果未明，歐洲方面亦受意大利財政困局、英國脫歐未成等問題所困擾，至於日本10月份又上調銷售稅，將會持續影響企業投資情緒，香港經濟無可避免受波及。
李嘉誠及記者答問一覽：
記者：今年香港經濟會唔會擔心？
李：咁多年都喺香港，1940年就嚟香港，咁多年都係咁過。
記者：點睇今年經濟？
李：今年世界經濟一般都係好複雜，大家都要小心啦。
記者：香港樓價？
李：我不嬲宗旨，同埋應該盡我心講實話，量力而為啦，譬如香港嘅朋友，香港人嘅，買嚟自己住，分期付款冇問題嘅，咁你應該買，因為買嚟住，千祈唔好買嚟炒，波動厲害啲啦。
記者：香港樓價趨勢？
李：樓價照計，經濟就係差啲，成個世界，我諗今年係過去好多年嚟，GDP全個世界嚟講，幾乎個個國家都面對低增長
記者：長實長和股份撥入家族信託，用意係？
李：股份都係經過家族信託控制。我不嬲都講，長江和記最主要兩間嚟講，我不嬲好多年宗旨，係有買冇賣，你睇我最近都係買，嚿年用咗唔少錢買。
記者：配售電能股份？
李：問Victor。52個國家，有啲國家投資好多好多，亦好多生意，無法子樣樣即刻答。股東嚟講最簡單，譬如屈臣氏，零售超過1.5萬間，香港得700間，但係香港要加多700間，絕對冇可能，要對得住股東，邊度適合做呢啲生意。
記者：世界各地咁多資產，返嚟香港嗎？
李：香港冇呢種生意，做油、能源，香港冇咁嘅機會，但係第二個國家加拿大，我哋做；南中國海，我哋都有做；印尼都有。所以生意嚟講，我1940年嚟香港，當然愛香港，當香港係家鄉。
記者：特首話明日大嶼計劃要填海？
李：我冇法子逐件逐件再嚟講啦。
記者：今年市道有冇機會買多啲香港地？
李：問Victor。
記者：市況波動投資乜？
李：52個國家我哋都有生意喺度
記者：都係分散、穩陣為主？
李：好多種生意，總之香港係冇，冇可能做，喺外面，我哋都要做得好好，香港係自己家鄉。
記者：今年願望？
李：同大家一樣，安定繁榮、煩惱少、開心嘢多。
investMAN
For People of Style & Substance
掌握理財智慧 感受生活品味
http://facebook.com/investMAN.hk
|
鍾意就快D Share啦！
|
|
|
